തിരുവനന്തപുരം: കൊലയാളി സംഘങ്ങള്ക്കു നേതൃത്വം നല്കിയവരെ വിളിച്ചു ചോദ്യം ചെയ്താല് തെരഞ്ഞെടുപ്പു കാലത്തെ സംഭാഷണങ്ങള് അവര് വെളിപ്പെടുത്തുമെന്നും അങ്ങനെ ഒരു കാര്യം ചെയ്യാന് മുഖ്യമന്ത്രി പിണറായി വിജയന്റെ മുട്ടു വിറയ്ക്കുമെന്നും പ്രതിപക്ഷ നേതാവ് വി.ഡി.സതീശന്.
കൊല്ലുമെന്നും വെള്ളപുതപ്പിച്ച് കിടത്തുമെന്നും പരസ്യമായി മുദ്രാവാക്യം വിളിച്ചിട്ടും പോലീസിന് മനസിലാകുന്നില്ലെങ്കില് ഉത്തരവാദിത്തപ്പെട്ടവര് രാജിവെയ്ക്കുന്നതാണ് നല്ലത്. ആര്എസ്എസിന്റെയും എസ്ഡിപിഐയുടെയും നേതൃത്വം അറിയാതെ ഈ കൊലപാതകങ്ങള് നടക്കില്ലെന്നും സതീശന് പറഞ്ഞു. ന്യൂനപക്ഷ, ഭൂരിപക്ഷ വര്ഗീയവാദികളെ പൊതുസമൂഹത്തില് നിന്നും ഒറ്റപ്പെടുത്തണം. രണ്ടു കൂട്ടരുമായും ഒരു വിട്ടുവീഴ്ചയും ഉണ്ടാകില്ല. ഇവരുമായി സന്ധി ചെയ്ത് കേരളത്തെ തകര്ക്കാന് യുഡിഎഫ് കൂട്ടുനില്ക്കില്ലെന്നും സതീശന് പറഞ്ഞു.
ഒരു കാരണവശാലും വര്ഗീയതയുമായി സന്ധിയില്ല. കേരളത്തില് മൂന്നു കൂട്ടര്ക്കാണ് സ്വന്തമായി തീറ്റിപ്പോറ്റുന്ന കൊലയാളി സംഘങ്ങളുള്ളത്. ഭൂരിപക്ഷ വര്ഗീയ വാദികള്ക്കും ന്യൂനപക്ഷ വര്ഗീയ വാദികള്ക്കും പിന്നെ സിപിഎമ്മിനും – അദ്ദേഹം ആരോപിച്ചു.
