തിരുവനന്തപുരം : മുഖ്യമന്ത്രിയും ഗവര്ണറും തമ്മിലെ തര്ക്കം മുമ്പും ഉണ്ടായിട്ടുണ്ടന്നും അത് ഒത്തുതീര്പ്പിലെ ത്തിയതാണെന്നും പ്രതിപക്ഷ നേതാവ് വി.ഡി സതീശന്. മുഖ്യമന്ത്രിയും ഗവര്ണറും തമ്മിലെ തര്ക്കവും, ബി.ജെ.പിയുടെ കേന്ദ്രസര്ക്കാറും സി.പി.എമ്മിന്റെ സംസ്ഥാന സര്ക്കാറും തമ്മിലെ തര്ക്കവും ഒത്തു തീര്പ്പിലെത്തിക്കാന് ഇട നിലക്കാരുണ്ട്. വി.സി നിയമനവുമായി ബന്ധപ്പെട്ട തര്ക്കവും അങ്ങനെ ഒത്തുതീര്പ്പിലെത്തുകയോ എത്താതിരിക്കുകയോ ചെയ്യട്ടെയെന്നും തങ്ങളുടെ വിഷയം അതല്ലെന്നും സതീശന് മാധ്യമങ്ങളോട് പറഞ്ഞു.’സര്വകലാശാലകളുടെ ഭരണപരമായ കാര്യങ്ങളിലും അക്കദമിക് ആയ കാര്യങ്ങളിലും സി.പി.എം ഇടപെടുകയാണെന്നത് ഞങ്ങള് നിരന്തരം ഉന്നയിക്കുന്നതാണ്. അതാണ് ഞങ്ങളുടെ വിഷയം’ -വി.ഡി സതീശന് പറഞ്ഞു. കണ്ണൂര് യൂണിവേഴ്സിറ്റിയുടെ വി.സി പുനര്നിയമനം നിയമവിരുദ്ധമാണെന്ന് യു.ഡി.എഫ് നേരത്തെ ചൂണ്ടികാട്ടിയതാണ്. ഗവര്ണര് അതില് ഒപ്പിട്ടതും തെറ്റാണ്. തങ്ങള് നേരത്തെ ചൂണ്ടികാട്ടിയത് ഗവര്ണര് അംഗീകരിക്കുക മാത്രമാണ് അദ്ദേഹം മുഖ്യമന്ത്രിക്ക് കൊടുത്ത കത്തിലുള്ളതെന്നും സതീശന് പറഞ്ഞു.
സര്വകലാശാലകളില് ഏതൊരു പോസ്റ്റ് ഡിക്ലയര് ചെയ്താലും അത് ഏതെങ്കിലും സി.പി.എം നേതാവിന്റെ ബന്ധുവിന് റിസര്വ് ചെയ്തിട്ടായിരിക്കും നടപടി തുടങ്ങിയിട്ടുണ്ടാകുക എന്നത് വിദ്യാസമ്പന്നര്ക്കൊക്കെ ഇപ്പോള് ധാരണയുണ്ട്. അതുകൊണ്ട് അതിന് അപേക്ഷിക്കാന് പോലും ആരും തയാറാകാത്ത സ്ഥിതിയാണ്. പിന്വാതില് നിയമനങ്ങളുടെ നീണ്ട നിരയാണ് സര്വകലാശാലകളിലുള്ളത്. ആരോപണ വിധേയമായ മുഴുവന് നിയമനങ്ങളും റദ്ദാക്കി ജുഡീഷ്യല് അന്വേഷണം പ്രഖ്യാപിക്കണം. ഇതിനായി കോണ്ഗ്രസ് പാര്ട്ടിയും യു.ഡി.എഫും സമര രംഗത്തുണ്ടാകുമെന്നും സതീശന് മാധ്യമങ്ങളോട് പറഞ്ഞു.
