തിരുവനന്തപുരം: ഈ അധ്യയന വര്ഷം മുതല് നാല് വര്ഷ ബിരുദ ഓണേഴ്സ് കോഴ്സുകള് അടിച്ചേല്പ്പിക്കാനുള്ള തീരുമാനത്തില് നിന്നും സര്ക്കാര് പിന്വാങ്ങണമെന്ന് പ്രതിപക്ഷ നേതാവ് വിഡി സതീശന്. അക്കാദമിക് വിദഗ്ധരുമായോ അധ്യാപക സമൂഹവുമായോ പ്രതിപക്ഷ രാഷ്ട്രീയ പാര്ട്ടികളുമായോ കൂടിയാലോചനകള്ക്ക് പോലും തയാറാകാതെ ധൃതി പിടിച്ചുള്ള തീരുമാനം ജനാധിപത്യ വിരുദ്ധവും ഉന്നത വിദ്യാഭ്യാസ മേഖലയെ തകര്ക്കുന്നതുമാണെന്നും അദ്ദേഹം ആരോപിച്ചു. കേന്ദ്ര സര്ക്കാര് രാജ്യത്ത് നടപ്പാക്കാന് ശ്രമിക്കുന്ന ദേശീയ വിദ്യാഭ്യാസ നയത്തിന് പിന്തുണ പ്രഖ്യാപിക്കുകയാണ് പുതിയ പരിഷ്ക്കരണത്തിലൂടെ പിണറായി സര്ക്കാരും ചെയ്യുന്നതെന്നും സതീശന് കുറ്റപ്പെടുത്തി.
കരിക്കുലം പരിഷ്ക്കരിച്ചതിന് ശേഷം 2024-25 അധ്യയന വര്ഷം മുതല് നാല് വര്ഷ ബിരുദ ഓണേഴ്സ് കോഴ്സ് നടപ്പാക്കിയാല് മതിയെന്ന നിലപാടാണ് കേരള, എം.ജി, കാലിക്കട്ട്, കണ്ണൂര് സര്വകലാശാല പ്രതിനിധികളും അധ്യാപക സംഘടനകളും സര്ക്കാര് വിളിച്ച യോഗത്തില് സ്വീകരിച്ചത്. എന്നാല് ഈ അധ്യയന വര്ഷം തന്നെ നാല് വര്ഷ ബിരുദ കോഴ്സ് നടപ്പാക്കുമെന്ന പിടിവാശിയിലാണ് സര്ക്കാരും ഉന്നതവിദ്യാഭ്യാസ മന്ത്രിയും.