തിരുവനന്തപുരം : രാജ്യാന്തര വിമാനത്താവളത്തിൽ വാഹനങ്ങളുടെ പാർക്കിങ് ഫീസ് കുത്തനെ ഉയർത്തി. യാത്രക്കാരെ കയറ്റാനോ ഇറക്കാനോ പോകുന്ന വാഹനങ്ങൾക്കു ചെറിയ നിരക്കിൽ വിമാനത്താവളത്തിനുള്ളിൽ ചെലവിടാനുള്ള സമയവും കുറച്ചു. നേരത്തേ 10 മിനിറ്റായിരുന്നു കുറഞ്ഞ സമയം 8 മിനിറ്റാക്കി കുറച്ചു. ഈ സമയത്ത് ഇരുചക്രവാഹനങ്ങൾക്കും സ്വകാര്യ കാറുകൾക്കും സൗജന്യമായി പോയിവരാമായിരുന്നെങ്കിൽ ഇപ്പോഴിത് സ്വകാര്യകാറുകൾക്കു മാത്രമാക്കി. ഇരുചക്രവാഹനങ്ങൾക്ക് ആദ്യത്തെ അര മണിക്കൂർ 50 രൂപ ഫീസ് ഈടാക്കും. ഓട്ടോറിക്ഷകൾക്ക് അര മണിക്കൂറിന് 20 രൂപയായിരുന്നത് 50 രൂപയായി ഉയർത്തി.
സ്വകാര്യ കാറുകൾക്ക് 8 മിനിറ്റ് സൗജന്യമുണ്ടെങ്കിലും ടാക്സികൾക്ക് രണ്ടുതരത്തിൽ ഫീസ് ഈടാക്കും. യാത്രക്കാരെ ഇറക്കാനെത്തുന്ന വാഹനങ്ങൾക്ക് ആദ്യ 8 മിനിറ്റിൽ 50 രൂപയും യാത്രക്കാരെ കയറ്റാനെത്തുന്നവർക്ക് 180 രൂപയുമാണ് ഫീസ്. മുൻപ് 10 മിനിറ്റ്, 2 മണിക്കൂർ, 12 മണിക്കൂർ, 24 മണിക്കൂർ സമയക്രമങ്ങളിലായിരുന്നു ഫീസ് മാറിയിരുന്നത്. ഇപ്പോൾ 8 മിനിറ്റ്, 30 മിനിറ്റ്, ഒരു മണിക്കൂർ, 2 മണിക്കൂർ, 3 മണിക്കൂർ, 4 മണിക്കൂർ, 24 മണിക്കൂർ എന്നിങ്ങനെ സമയപരിധി പലതരത്തിലാക്കി ഉയർന്ന നിരക്ക് ഈടാക്കാനാണു തീരുമാനം. ഒക്ടോബർ 1 മുതൽ പുതിയ നിരക്ക് പ്രാബല്യത്തിലായി. വിമാനത്താവളത്തിലെ ജീവനക്കാർക്കും തൊഴിലാളികൾക്കും ടാക്സി ഡ്രൈവർമാർക്കും ഉൾപ്പെടെ നിരക്കുവർധന ഇരുട്ടടിയാകും.
