അടൂര് : അടൂരില് വ്യാജ നമ്പര് പ്ലേറ്റ് ഉപയോഗിച്ച വാഹനങ്ങള് നിരത്തുകളില് ചീറിപ്പായുന്നു. നിരവധി ഇരുചക്ര വാഹനങ്ങളാണ് ഇത്തരത്തില് സഞ്ചരിക്കുന്നത്. ഇതില് ചിലത് അടൂര് പോലീസിന്റെ പിടിയിലാവുകയും ചെയ്തു. ഇത്തരം തട്ടിപ്പുകാര് മൂലം നിയമം ലംഘിക്കാത്ത വാഹന ഉടമകളാണ് ഊരാക്കുടുക്കിലാകുന്നത്. അടുത്തിടെയാണ് അടൂരില് ഇത്തരത്തില് നമ്പര് പ്ലേറ്റ് മാറ്റി വാഹനം ഓടുന്നത് ട്രാഫിക് പോലീസിന്റെ ശ്രദ്ധയില്പ്പെടുന്നത്. യുവാക്കളാണ് ഇത്തരത്തില് നിയമ ലംഘനം നടത്തുന്നവരില് അധികവും. അടൂര് ട്രാഫിക് പോലീസ് ആണ് ഇത്തരക്കാരില് ചിലരെ നിയമത്തിന് മുന്നില് എത്തിച്ചത്.
ട്രാഫിക് എസ്.ഐ ജി.സുരേഷ് കുമാറിന്റെ നേതൃത്വത്തില് അടൂരില് വാഹന പരിശോധന നടത്തവെ ഒരു ബൈക്ക് അമിത വേഗത്തില് പാഞ്ഞുപോകുന്നത് കണ്ടു. നിയമ ലംഘനം ശ്രദ്ധയില്പ്പെട്ടതോടെ വാഹനത്തിന്റെ നമ്പര് പ്ലേറ്റിന്റെ ഫോട്ടോ എടുത്ത് ചെല്ലാന് മിഷീനില് കൊടുത്ത് അതില് കാണിച്ച ഉടമയെ വിളിച്ചപ്പോള് അദ്ദേഹത്തിന്റെ വാഹനമല്ലെന്ന് തിരിച്ചറിയുകയായിരുന്നു. എന്നാല് ചീറിപ്പാഞ്ഞു പോയ ബൈക്കില് ഉപയോഗിച്ചത് അദ്ദേഹം ഉപയോഗിക്കുന്ന വാഹനത്തിന്റെ നമ്പരും. തുടര്ന്ന് നടത്തിയ നിരന്തര പരിശോധനയില് പ്രതിയെ അടൂര് പോലീസ് പിടികൂടുകയും ചെയ്തു.
