പത്തനംതിട്ട : തുടര്ച്ചയായി അപകടങ്ങള് നടക്കുന്ന മണ്ണാറക്കുളഞ്ഞി ആശുപത്രിപ്പടിയില് അപകടങ്ങള് കുറയ്ക്കുവാന് റോഡിന് നടുവില് സ്ഥാപിച്ച ഡിവൈഡര് സ്റ്റമ്പുകളും അമിത വേഗതയില് എത്തിയ വാഹനങ്ങള് ഇടിച്ചു തകര്ത്തു. പുനലൂര് – മൂവാറ്റുപുഴ സംസ്ഥാന പാതയിലെ പ്രധാന ജംഗ്ഷനുകളില് ഒന്നാണ് മണ്ണാറക്കുളഞ്ഞി ആശുപത്രിപ്പടി. ശബരിമല പാതയും പുനലൂര് – പൊന്കുന്നം പാതയും സംഗമിക്കുന്നത് ഇവിടെയാണ്. ശബരിമല പാതയിലേക്ക് തിരിയുന്ന ഭാഗത്ത് റോഡിന് വീതി കുറവാണ്. ഇവിടെ ഡിവൈഡര് സ്ഥാപിച്ച ശേഷമാണ് ഇത്രയധികം അപകടങ്ങള് വര്ധിച്ചത്. ശംഖിന്റെ ആകൃതിയില് നിര്മ്മിച്ച ഡിവൈഡറിന്റെ ഭാഗത്ത് വരുമ്പോള് ശബരിമല പാതയിലേക്ക് കയറുന്നവര് ഒന്ന് പതറും. ഇത് അപകടത്തിലാവും കലാശിക്കുക.
വാഹനങ്ങള് ഓവര്ടേക്ക് ചെയ്തു വരുന്നതും അപകടങ്ങള്ക്ക് കാരണമായിരുന്നു. ഇത് ഒഴിവാക്കാനാണ് റോഡിന് നടുവില് ഡിവൈഡര് സ്റ്റമ്പുകള് സ്ഥാപിച്ചത്. എന്നാല് അമിത വേഗത്തില് എത്തുന്ന വാഹനങ്ങള് കയറി ഇവയെല്ലാം ഒടിഞ്ഞു പോയി. ജംഗ്ഷനുകളില് വാഹനങ്ങള് ആതാത് ട്രാക്കുകളില് കൂടി പോകുന്നതിനും നിര തെറ്റിച്ച് വരുന്നത് ഒഴിവാക്കാന് കഴിയുമെന്നും ആയിരുന്നു ഇത് സ്ഥാപിച്ചപ്പോള് കരുതിയിരുന്നത്. എന്നാല് സംഭവിച്ചത് നേരെ വിപരീതവും. എരുമേലി, കുമളി, പൊന്കുന്നം ഭാഗത്തേക്ക് അടക്കമുള്ള വാഹനങ്ങള് ഈ വഴിയാണ് സഞ്ചരിക്കുന്നത്. ശബരിമല പാതയിലേക്ക് തിരിയാന് വാഹനങ്ങള് പെട്ടന്ന് ബ്രേക്ക് ചെയ്യുമ്പോള് ഇടിക്കുന്ന സംഭവങ്ങളും വര്ധിക്കുന്നുണ്ട്. മണ്ണാറക്കുളഞ്ഞി ജംഗ്ഷനില് സിഗ്നല് സംവിധാനം കൊണ്ടുവന്നെങ്കില് മാത്രമേ ഇതിന് പരിഹാരം കാണാന് കഴിയു എന്നും യാത്രക്കാര് പറയുന്നു.
