കൊച്ചി : കോണ്ഗ്രസ് സംഘടനാ ജനറല് സെക്രട്ടറി കെ.സി. വേണുഗോപാലിന്റെ രാഷ്ട്രീയ സ്വാധീനത്തെയും തിരഞ്ഞെടുപ്പ് തന്ത്രങ്ങളെയും പ്രശംസിച്ച് എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന്. ഇന്ത്യയിലൊട്ടാകെ കോണ്ഗ്രസിനെ നയിക്കാന് അധികാരമുള്ള അതികായനായി കെ.സി. വേണുഗോപാല് മാറിയെന്ന് അദ്ദേഹം അഭിപ്രായപ്പെട്ടു. ഇന്ത്യന് നാഷണല് കോണ്ഗ്രസില് പ്രസിഡന്റിനും സോണിയ ഗാന്ധിക്കും പിന്നില് മൂന്നാം സ്ഥാനം ഇന്ന് കെ.സി. വേണുഗോപാലിനാണെന്ന് വെള്ളാപ്പള്ളി പറഞ്ഞു. ദേശീയ രാഷ്ട്രീയത്തില് അദ്ദേഹത്തിന്റെ അഭിപ്രായങ്ങള്ക്ക് വലിയ വിലയുണ്ടെന്നും എം.എല്.എമാരെയും എം.പിമാരെയും സൃഷ്ടിക്കാന് അദ്ദേഹത്തിന്റെ സ്വാധീനം സഹായിക്കുന്നുണ്ടെന്നും അദ്ദേഹം അഭിപ്രായപ്പെട്ടു.
കേരളത്തിലെ തിരഞ്ഞെടുപ്പ് വിജയത്തിന്റെ പ്രധാന ശില്പി കെ.സി. വേണുഗോപാലാണെന്ന് വെള്ളാപ്പള്ളി വിശേഷിപ്പിച്ചു. പാര്ട്ടിക്കുള്ളിലെ തര്ക്കങ്ങള് പരിഹരിച്ച് ഒറ്റക്കെട്ടായി സ്ഥാനാര്ത്ഥികളെ നിര്ത്തുന്നതിലും ഫണ്ടിംഗ് കൃത്യമായി ഏകോപിപ്പിക്കുന്നതിലും അദ്ദേഹം വലിയ നൈപുണ്യം കാണിച്ചു. ഇടതുപക്ഷത്തിന്റെ പ്രചരണ രീതികളെ മറികടക്കുന്ന തരത്തില് മണി പവറും മാന് പവറും ഉപയോഗിക്കാന് അദ്ദേഹത്തിന് സാധിച്ചുവെന്നും വെള്ളാപ്പള്ളി ചൂണ്ടിക്കാട്ടി.
