തിരുവനന്തപുരം : മുതിര്ന്ന മാധ്യമപ്രവര്ത്തകനും മാതൃഭൂമി മുന് ബ്യൂറോ ചീഫുമായ ജി ശേഖരന് നായര് (75)നിര്യാതനായി. ഇന്ന് രാവിലെ 11 മണിയോടെ തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. ഹൃദയ സംബന്ധമായ അസുഖത്തെ തുടര്ന്ന് രണ്ടാഴ്ച്ചയിലേറെയായി ചികിത്സയിലായിരുന്നു. മൂന്ന് തവണ സംസ്ഥാന സര്ക്കാരിന്റെ മാധ്യമ അവാര്ഡ് ഉള്പ്പെടെ പത്രപ്രവര്ത്തനരംഗത്തെ മികവിന് 35 ഓളം പുരസ്കാരങ്ങള് ഇദ്ദേഹം നേടിയിട്ടുണ്ട്.
പ്രസ് ക്ലബ് മുന് സെക്രട്ടറി കൂടിയായിരുന്ന ജി ശേഖരന് നായരുടെ നിര്യാണത്തില് സ്പീക്കര് എ.എന് ഷംസീര് അനുശോചിച്ചു. പതിറ്റാണ്ടുകളോളം നിയമസഭാ റിപ്പോര്ട്ടിംഗ് രംഗത്ത് ശേഖരന് നായര് തന്റെ പ്രതിഭ തെളിയിച്ചയാളാണെന്നും അദ്ദേഹത്തിന്റെ കുടുംബാംഗങ്ങളുടേയും മാധ്യമ സുഹൃത്തുക്കളുടേയും ദുഃഖത്തില് പങ്ക് ചേരുന്നതായും സ്പീക്കര് അറിയിച്ചു. 1980ല് മാതൃഭൂമിയില് ചേര്ന്ന ജി ശേഖരന് നായര് തിരുവനന്തപുരം, കൊല്ലം, തൃശ്ശൂര്, ആലപ്പുഴ എന്നിവിടങ്ങളില് ബ്യൂറോ ചീഫായും കോഴിക്കോട് ചീഫ് സബ് എഡിറ്ററായും പ്രവര്ത്തിച്ചിട്ടുണ്ട്. അന്വേഷണാത്മക പത്രപ്രവര്ത്തനത്തിലെ മികവിന് മൂന്ന് സംസ്ഥാന അവാര്ഡുകള് ലഭിച്ചിട്ടുണ്ട്.
പത്രപ്രവര്ത്തക യൂണിയന് സംസ്ഥാന സെക്രട്ടറിയായ് ഇദ്ദേഹം പ്രവര്ത്തിച്ചിട്ടുണ്ട്. ഫ്രാന്സ്, ചൈന, യു.എസ്, റഷ്യ, ബ്രിട്ടന്, ജര്മനി തുടങ്ങി 30-ഓളം രാജ്യങ്ങള് സന്ദര്ശിച്ചിട്ടുണ്ട്. 1999-ല് കൊളംബോയില് നടന്ന സാര്ക്ക് ഉച്ചകോടി റിപ്പോര്ട്ട് ചെയ്യാന് അന്നത്തെ പ്രധാനമന്ത്രി എ.ബി. വാജ്പേയിയോടൊപ്പം പോയ മാധ്യമസംഘത്തില് അംഗമായിരുന്നു. രണ്ട് തവണ ശ്രീലങ്ക സന്ദര്ശിച്ച് ആഭ്യന്തരയുദ്ധം ഇദ്ദേഹം റിപ്പോര്ട്ട് ചെയ്തിട്ടുണ്ട്.
