കോന്നി: ഡ്രൈവിംഗ് സ്കൂളുകളില് സംസ്ഥാന വ്യാപകമായി വിജിലന്സ് നടത്തിയ പരിശോധനയുടെ ഭാഗമായി പത്തനംതിട്ട ഡിസ്ട്രിക് മോട്ടോര് ഡ്രൈവിങ് സ്കൂള് ഓണേഴ്സ് ആന്ഡ് വര്ക്കേഴ്സ് സോഷ്യല് വെല്ഫെയര് കോ ഓപ്പറേറ്റീവ് സൊസൈറ്റി ലിമിറ്റഡിന്റെ കീഴില് കോന്നി മാമ്മൂട്ടില് പ്രവര്ത്തിക്കുന്ന റീജിയണല് ഡ്രൈവേഴ്സ് ട്രെയിനിങ് സെന്ററില് വിജിലന്സ് വിഭാഗം പരിശോധന നടത്തി. സ്ഥാപനത്തിന് സ്റ്റോപ്പ് മെമ്മോ നല്കി. മോട്ടോര് വാഹന വകുപ്പും ഇവര്ക്ക് നോട്ടീസ് നല്കിയിട്ടുണ്ട്.
സംസ്ഥാനത്തെ ഡ്രൈവിംഗ് സ്കൂളുകളില് ഡ്രൈവര്മാര്ക്ക് കാര്യമായ പരിശീലനം നല്കാതെ ലൈസന്സ് സംഘടിപ്പിച്ച് നല്കുന്നു എന്ന ആക്ഷേപത്തെ തുടര്ന്നാണ് കോന്നിയിലും പരിശോധന നടത്തിയത്. പത്തനംതിട്ട ഡിസ്ട്രിക് മോട്ടോര് ഡ്രൈവിങ് സ്കൂള് ഓണേഴ്സ് ആന്ഡ് വര്ക്കേഴ്സ് സോഷ്യല് വെല്ഫെയര് കോ ഓപ്പറേറ്റീവ് സൊസൈറ്റി ലിമിറ്റഡിന്റെ പേരില് മുന്പും അഴിമതി നടന്നതായി ഓഡിറ്റ് വിഭാഗം കണ്ടെത്തിയിരുന്നു. 2021 – 22 വര്ഷത്തെ ഓഡിറ്റ് പരിശോധനയില് വലിയ സാമ്പത്തിക ക്രമകേട് നടന്നിട്ടുള്ളതായാണ് അന്ന് ഓഡിറ്റ് വിഭാഗം കണ്ടെത്തിയത്. ബാങ്ക് പ്രസിഡണ്ട് ഭരണ സമിതി കമ്മറ്റി വിളിക്കുന്നില്ല എന്നും കണക്കുകള് അവതരിപ്പിക്കാറില്ല എന്നും ഭരണ സമിതി അംഗങ്ങള് ആരോപിച്ചിരുന്നു. കോന്നിയില് മാത്രം പതിനെട്ട് ഡ്രൈവിംഗ് സ്കൂളുകളും ജില്ലയില് പല ഭാഗങ്ങളിലെ ഡ്രൈവിംഗ് സ്കൂള് ഉടമകള്ക്കും സൊസൈറ്റിയില് ഓഹരിയുണ്ട്.
