കൊച്ചി : എറണാകുളം മുന്‍ ജില്ലാ കളക്ടര്‍ എം.ജി. രാജമാണിക്യത്തിനെതിരെ അന്വേഷണത്തിന് സര്‍ക്കാര്‍ അനുമതി. അഴിമതി നിരോധന നിയമപ്രകാരമായിരിക്കും അന്വേഷണം നടത്തുക. കൊച്ചി മെട്രോക്കായി ശീമാട്ടിയുടെ ഭൂമി ഏറ്റെടുത്ത കേസിലാണ് അന്വേഷണം നടത്തുക.
കൊച്ചി മെട്രോക്കായി ഭൂമി വിട്ടുനല്‍കാന്‍ വസ്ത്രവ്യാപാര സ്ഥാപനമായ ശീമാട്ടി തയാറായിരുന്നില്ല. തുടര്‍ന്ന് മെട്രോയുടെ നിര്‍മാണം മുടങ്ങുകയും ചെയ്തിരുന്നു. മാരത്തോണ്‍ ചര്‍ച്ചകള്‍ക്കൊടുവിലാണ് ശീമാട്ടിയുടെ ഭൂമി ഏറ്റെടുക്കാന്‍ സാധിച്ചത്. എന്നാല്‍ ഭൂമി ഏറ്റെടുക്കുന്നതിനായി ഉണ്ടാക്കിയ കരാര്‍ വ്യവസ്ഥകള്‍ വിവാദമായിരുന്നു.
ഭൂമിക്ക് അധിക തുകയാണ് കരാര്‍ പ്രകാരം നല്‍കിയതെന്നായിരുന്നു പ്രധാന ആരോപണം. ഇതിലൂടെ കോടികളുടെ നഷ്ടം മെട്രോ റെയില്‍ കോര്‍പ്പറേഷന് ഉണ്ടായി. 2016ല്‍ ഇതുമായി ബന്ധപ്പെട്ട കേസില്‍ സര്‍ക്കാരിന്റെ അനുമതിയോടെ അന്വേഷണം നടത്തണമെന്ന് തിരുവനന്തപുരം വിജിലന്‍സ് കോടതി നിര്‍ദേശിച്ചിരുന്നു. ഇക്കാര്യത്തിലാണ് ഇപ്പോള്‍ സര്‍ക്കാര്‍ തീരുമാനമുണ്ടായത്.
