തിരുവനന്തപുരം : കമ്മ്യൂണിസ്റ്റ് പാര്ട്ടിയുടെ സ്വാതന്ത്ര്യദിന ആഘോഷത്തെ പരിഹസിച്ച കെ.സുധാകരന് മറുപടിയുമായി സി.പി.എം ആക്ടിംഗ് സെക്രട്ടറി എ.വിജയരാഘവന്. ‘കെ.സുധാകരന് സ്വാതന്ത്ര്യസമര മൂല്യങ്ങളെകുറിച്ചോ, സ്വാതന്ത്ര്യസമര പ്രസ്ഥാനങ്ങളെകുറിച്ചോ ഉള്ള അറിവില്ലായ്മയില് നിന്നാണ് ഇത്തരം വാക്കുകള് വരുന്നതെന്ന് വിജയരാഘവന് തുറന്നടിച്ചു.
ഇന്ത്യയുടെ ദേശീയ സ്വാതന്ത്ര്യസമര പോരാട്ടത്തില് അഭിമാനം കൊണ്ടവരാണ് കമ്മ്യൂണിസ്റ്റുക്കാർ. സ്വാതന്ത്ര്യത്തെ കുറിച്ചുള്ള നിങ്ങളുടെ സമീപനമല്ല ഞങ്ങളുടെ പാർട്ടിയ്ക്ക് ഉള്ളതെന്നും കമ്മ്യൂണിസ്റ്റുകാര് എല്ലാകാലത്തും സ്വാതന്ത്ര്യസമര മൂല്യങ്ങള് ഉയര്ത്തിപ്പിടിച്ചവരാണെന്നും രാഘവൻ ചൂണ്ടി കാണിച്ചു.
രാജ്യം 75-ാം സ്വാതന്ത്ര്യ ദിനം ആഘോഷിക്കുമ്പോള് കമ്മ്യൂണിസ്റ്റ് പാര്ട്ടി ആദ്യത്തെ സ്വാതന്ത്ര്യദിനം ആചരിക്കുകയാണെന്നും, സമസ്താപരാധങ്ങളും ക്ഷമിക്കണമേയെന്ന് ഇന്ത്യക്കാരുടെ മുമ്പില് തൊഴുത് പറയുന്നതിന് തുല്യമാണെന്നുമാണ് സുധാകരന് പരിഹസിച്ചത്. ആഗസ്റ്റ് 15 നെ ആപത്ത് 15 എന്ന് പ്രചരിപ്പിച്ചവരാണ് കമ്മ്യൂണിസ്റ്റ് പ്രസ്ഥാനമെന്നും ഇന്ത്യക്ക് സ്വാതന്ത്ര്യം കിട്ടിയില്ലെന്നവര് സഖാക്കളെ പറഞ്ഞ് പഠിപ്പിച്ചുവെന്നും സുധാകരന് ആരോപിച്ചു.
