കൊളംബോ : ശ്രീലങ്കയുടെ പുതിയ പ്രധാനമന്ത്രിയായി റെനില് വിക്രമസിംഗെയെ തിരഞ്ഞെടുത്തതായി റിപ്പോര്ട്ട്. ഇന്ന് തന്നെ വിക്രമസിംഗെ സത്യപ്രതിജ്ഞ ചൊല്ലി അധികാരമേറ്റെടുക്കുമെന്ന് ശ്രീലങ്കന് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നു. മെയ് 9നായിരുന്നു ശ്രീലങ്ക നേരിടുന്ന കടുത്ത സാമ്പത്തിക പ്രതിസന്ധിയെ തുടര്ന്നുള്ള പ്രതിഷേധങ്ങള് കലാപമായി മാറിയതിന് പിന്നാലെ മഹിന്ദ രജപക്സെ പ്രധാനമന്ത്രി സ്ഥാനം ഒഴിഞ്ഞത്.
രജപക്സെ രാജിവെച്ചതിന് പിന്നാലെ ശ്രീലങ്കയില് സംഘര്ഷാവസ്ഥ നിലനില്ക്കുന്ന സാഹചര്യത്തില് പുതിയ പ്രധാനമന്ത്രിയും മന്ത്രിസഭയും ഈ ആഴ്ച തന്നെ അധികാരമേല്ക്കുമെന്ന് പ്രസിഡന്റ് ഗോട്ടബയ രജപക്സെ അറിയിച്ചിരുന്നു. ആ തീരുമാനം കൂടുതല് വൈകിപ്പിക്കാതിരിക്കാനാണ് വിക്രമസിംഗെയെ ഇന്ന് തന്നെ വീണ്ടും ശ്രീലങ്കയുടെ പ്രധാനമന്ത്രി സ്ഥാനത്തേക്കെത്തിക്കുന്നത്.
ഇത് അഞ്ചാം തവണയാണ് ശ്രീലങ്കയുടെ പ്രധാനമന്ത്രി പദത്തിലേക്ക് വിക്രമസിംഗെ എത്തുന്നത്. 2020ല് ശ്രീലങ്കയില് രാഷ്ട്രീയ അനിശ്ചിതത്വം ആരംഭിക്കുന്നത് വിക്രമസിംഗെയെ പ്രധാനമന്ത്രി സ്ഥാനത്ത് നിന്നൊഴുവാക്കി മഹിന്ദ രജപക്സെ ഭരണമേറ്റെടുക്കുന്നതോടെയാണ്. 1977ലാണ് വിക്രമസിംഗെ ആദ്യമായി എംപി സ്ഥാനത്തേക്ക് തിരഞ്ഞെടുക്കപ്പെടുന്നത്.
പുതുതായി രൂപീകരിക്കുന്ന ശ്രീലങ്കന് മന്ത്രിസഭയില് രജപക്സെ കുടുംബത്തില് നിന്നും ആരുമുണ്ടാകില്ലയെന്ന് പ്രസിഡന്റ് ഗോട്ടബയ രജപക്സെ രാജ്യത്തെ അഭിസംബോധന ചെയ്ത് അറിയിച്ചിരുന്നു. എന്നാല് താന് പ്രസിഡന്റ് സ്ഥാനത്ത് നിന്നൊഴില്ലയെന്ന് മഹീന്ദ രജപക്സെയുടെ സഹോദരന് ഗോട്ടബയ രജപക്സെ ആവര്ത്തിക്കുകയും ചെയ്തു.