കല്പ്പറ്റ : മലയാളികളില് നിന്ന് ലക്ഷങ്ങള് തട്ടിയെടുത്ത സംസ്ഥാനാന്തര വിസ തട്ടിപ്പ് സംഘം പിടിയില്. വയനാട് സൈബര് പോലീസാണ് പഞ്ചാബില്നിന്ന് നാല് പ്രതികളെ കസ്റ്റഡിയിലെടുത്തത്. കാനഡയിലേക്ക് വിസ നല്കാമെന്ന പേരില് മീനങ്ങാടി സ്വദേശിയില് നിന്ന് 15 ലക്ഷം രൂപ തട്ടിയെടുത്ത കേസിലാണ് അന്തര് സംസ്ഥാന പ്രതികള് പിടിയിലായത്. പഞ്ചാബ് ബട്ടിന്ഡ സ്വദേശികളായ ചരണ്ജീത് കുമാര്, രാജ്നീഷ് കുമാര്, ഇന്ദര്പ്രീത് സിങ്ങ്, കപില് ഗര്ഗ് എന്നിവരാണ് പ്രതികള്.
കോട്ടയം, പത്തനംതിട്ട ഉള്പ്പടെ സംസ്ഥാനത്തെ വിവിധഭാഗങ്ങളില് ഇവര് തട്ടിപ്പ് നടത്തിയിട്ടുണ്ടെന്ന് വ്യക്തമായി. കാനഡയിലേക്കുള്ള വിസയായിരുന്നു പ്രധാന വാഗ്ദാനം. കല്പറ്റ സൈബര് പോലീസ് പഞ്ചാബിലെ ഇന്ത്യ പാകിസ്ഥാന് അതിര്ത്തിയില് നിന്നും അതിസാഹസികമായാണ് ഇവരെ പിടികൂടിയത്. സമൂഹ മാധ്യമങ്ങളില് പരസ്യം നല്കിയായിരുന്നു പ്രതികളുടെ തട്ടിപ്പ്. വിസ തട്ടിപ്പ് സംഘത്തിലെ മുഖ്യകണ്ണിയായ സ്ത്രീയെ പിടികൂടാനുള്ള ശ്രമം തുടരുന്നതായും പോലീസ് അറിയിച്ചു.
