ഡല്ഹി: ഇന്ത്യക്ക് വിശ്വഗുരു ആകണമെങ്കില് ജനം ഐക്യത്തോടെ ജീവിക്കുന്ന സാഹചര്യം ഉണ്ടാകണമെന്ന് ഡല്ഹി മുഖ്യമന്ത്രി അരവിന്ദ് കെജ്രിവാള്. ജനങ്ങള്ക്ക് നല്ല വിദ്യാഭ്യാസവും ആരോഗ്യ സംവിധാനങ്ങളും ഉറപ്പാക്കണമെന്നും തടസ്സമില്ലാതെ വൈദ്യുതി ലഭ്യമാക്കണമെന്നും കെജ്രിവാള് പറഞ്ഞു. ഡല്ഹി സര്ക്കാറിന്റെ സ്വാതന്ത്ര്യദിന പരിപാടിയില് സംസാരിക്കുകയായിരുന്നു അരവിന്ദ് കെജ്രിവാള്. മണിപ്പൂര് കത്തുകയാണ്. മണിപ്പൂരില് രണ്ട് വിഭാഗങ്ങള് പരസ്പരം കൊല്ലുന്നു. ഹരിയാനയിലും ഇത് നടക്കുന്നു. നമ്മള് നമ്മളോടുതന്നെ കലഹിക്കുമ്പോള് എങ്ങനെയാണ് വിശ്വഗുരു ആകുന്നതെന്ന് കെജ്രിവാള് ചോദിച്ചു.
പ്രസംഗങ്ങളിലൂടെ മാത്രം ഇന്ത്യക്ക് വിശ്വഗുരു ആകാന് കഴിയില്ലെന്നും എല്ലാ പാവപ്പെട്ട മനുഷ്യര്ക്കും അവരുടെ കുട്ടികള്ക്ക് വിദ്യാഭ്യാസം നല്കുന്നതിലൂടെ സമ്പന്നരാകാന് കഴിയുമെന്നും അദ്ദേഹം പറഞ്ഞു. മണിപ്പൂരിലെ 150 വിദ്യാര്ഥികള്ക്ക് ഡല്ഹിയിലെ സ്കൂളുകളില് പ്രവേശനം നല്കുമെന്നും കെജ്രിവാള് വ്യക്തമാക്കി. ഡല്ഹിയിലെ അഡ്മിനിസ്ട്രേഷന് സേവനങ്ങളുടെ നിയന്ത്രണം സംബന്ധിച്ച നിയമം ജനങ്ങളുടെ ജനാധിപത്യ അവകാശങ്ങള് കവര്ന്നെടുക്കുന്നതാണെന്നും അദ്ദേഹം വ്യക്തമാക്കി.
