വിഴിഞ്ഞം: വിഴിഞ്ഞം സമരം ഒത്തുതീര്പ്പാക്കാനുള്ള സമവായ ചര്ച്ചകള് ഇന്നും തുടരും. സമരസമിതിയുമായി ചര്ച്ച നടത്തി അനുരജ്ഞനത്തിലെത്താനാണ് മന്ത്രിസഭാ ഉപസമിതി നീക്കം. സമരസമിതിയുടെ ആവശ്യങ്ങളില് സര്ക്കാര് കൃത്യമായ ഉറപ്പ് നല്കിയാല് ചര്ച്ചക്ക് തയ്യാറെന്നാണ് സമിതിയുടെ നിലപാട്. സര്ക്കാര് മുന്നോട്ടുവെച്ച ഒത്തുതീര്പ്പ് നിര്ദ്ദേശങ്ങളില് പലതിലും ധാരണയിലെത്താന് കഴിയാത്ത സാഹചര്യത്തിലാണ് മന്ത്രിസഭാ ഉപസമിതിയുടെ നീക്കം. ഈ ചര്ച്ച വിജയിച്ചാല് മുഖ്യമന്ത്രി സമരക്കാരെ കണ്ടേക്കും.
ഇന്നലെ മുഖ്യമന്ത്രിയും മന്ത്രിസഭാ ഉപസമിതിയും തമ്മില് ചര്ച്ച നടത്തിയിരുന്നു. എന്നാല് സമരസമിതിയുമായി ചര്ച്ച നടത്തിയിരുന്നില്ല. കൃത്യമായ ഉറപ്പുകള് വേണമെന്ന ലത്തീന് അതിരൂപതയുടെ നിലപാടാണ് തിരിച്ചടിയായത്. ഈ സാഹചര്യത്തിലാണ് മന്ത്രിസഭാ ഉപസമിതി വൈകിട്ട് സമരസമിതിയുമായി ചര്ച്ച നടത്തുന്നത്. തീരശോഷണം പഠിക്കാനുള്ള വിദഗ്ധസമിതിയില് സമരസമിതി നിര്ദ്ദേശിക്കുന്ന പ്രതിനിധിയെ വെക്കണമെന്ന ആവശ്യത്തില് സര്ക്കാര് വഴങ്ങിയിട്ടില്ല.
എന്നാല് തീരശോഷണത്തെ തുടര്ന്ന് വാടക വീടുകളില് കഴിയുന്നവര്ക്ക് 5500 ല് നിന്നും 8000 ആക്കാമെന്ന് സര്ക്കാര് വാഗ്ദാനം നല്കിയിരുന്നു. എന്നാല് കൂട്ടുന്ന തുക അദാനിഗ്രൂപ്പിന്റെ സിഎസ്ആര് ഫണ്ടില് നിന്നും നല്കാനായിരുന്നു നീക്കം. ഇതിനെയും സമരസമിതി എതിര്ത്തു. സര്ക്കാര് നല്കുന്ന ഉറപ്പുകള് പാലിക്കുന്നുണ്ടോ എന്ന് വിലയിരുത്താന് മോണിറ്ററിംഗ് കമ്മിറ്റി ഉണ്ടാക്കാമെന്നാണ് മറ്റൊരു നിര്ദ്ദേശം. ആവശ്യങ്ങള് അംഗീകരിച്ചാല് തുറമുഖ നിര്മ്മാണം നിര്ത്തിവെക്കണമെന്ന ആവശ്യത്തില് നിന്നും പിന്നോട്ട് പോകാന് വരെ തയ്യാറെന്ന സൂചനയും സമരസമിതി നല്കുന്നുണ്ട്.
