എറണാകുളം : സൗദി യുവതിയെ പീഡിപ്പിച്ചെന്ന കേസില് ജാമ്യം ലഭിച്ച വ്ളോഗര് ഷാക്കിര് സുബാന് കൊച്ചിയിലെത്തി. താന് നിരപരാധിയാണെന്നും കേസിനെ നിയമപരമായി നേരിടുമെന്നും മല്ലു ട്രാവലര് എന്ന പേരില് വ്ളോഗ് ചെയ്യുന്ന ഷാക്കിര് സുബാന് പ്രതികരിച്ചു. നീതി കിട്ടുമെന്ന് തന്നെയാണ് പ്രതീക്ഷ. ജീവിതം കോടതിയുടെ കനിവിലാണ്. ഒരു മാസം മുമ്പ് മകന് വാങ്ങിയ ടോയ് ഇപ്പോഴും കൈയ്യിലുണ്ട്. കേസിനെ നേരിടും. സ്റ്റേഷനിലേക്കാണ് പോകുന്നത്. പാസ്പോര്ട്ട് കൈമാറും. പോലീസിന്റേയും കോടതിയുടേയും നിര്ദ്ദേശപ്രകാരം മറ്റ് കാര്യങ്ങള് നീക്കുമെന്നും ഷാക്കിര് സുബാന് പറഞ്ഞു.
അഭിമുഖത്തിനെന്ന് പറഞ്ഞ് കൊച്ചിയിലെ സ്വകാര്യ ഹോട്ടലില് വിളിച്ചുവരുത്തിയ യുട്യൂബര് തന്നെ പീഡിപ്പിച്ചുവെന്ന സൗദി യുവതിയുടെ പരാതിയിലാണ് കേസ്. യുവതി എറണാകുളം സെന്ട്രല് പോലീസില് പരാതി നല്കുകയും, മജിസ്ട്രേറ്റിന് മുന്പില് രഹസ്യ മൊഴി നല്കുകയും ചെയ്തിരുന്നു. തുടര്ന്ന് കഴിഞ്ഞ മാസം 18നാണ് എറണാകുളം സെന്ട്രല് പോലീസ് ജാമ്യമില്ലാ വകുപ്പുകള് ചുമത്തി കേസെടുത്തത്. കേസില് ഹൈക്കോടതി ഷാക്കിര് സുബാന് ഉപാധികളോടെ ഇടക്കാല ജാമ്യം അനുവദിച്ചിരുന്നു. വിദേശത്ത് നിന്ന് തിരിച്ചെത്തിയ ശേഷം പാസ്പോര്ട്ട് മജിസ്ട്രേറ്റ് കോടതിയില് ഹാജരാക്കണം, സംസ്ഥാനം വിട്ട് പോകരുത് അന്വേഷണ ഉദ്യോഗസ്ഥന് മുന്നില് ഹാജരാകണം എന്നീ ഉപാധികളോടെയാണ് ജാമ്യം അനുവദിച്ചത്.
