ഇലന്തൂർ : ഇഴജന്തുക്കളുടെ ശല്യത്തെ തുടര്ന്ന് റോഡിലെ കാട് വെട്ടിത്തെളിച്ച് സഞ്ചാരയോഗ്യമാക്കി സന്നദ്ധ പ്രവർത്തകർ. ഇലന്തൂർ ഗ്രാമപഞ്ചായത്ത് 8-ാം വാർഡിലെ പ്രധാന ഇടറോഡായ പുറത്തുട്ട് പടി – ഇല്ലത്തുകാല – വിക്ടറി ക്ലബ് റോഡിലാണ് കഴിഞ്ഞ ദിവസം പാമ്പിനെ കണ്ടത്. കുട്ടികൾ പതിവായി കാൽനടയായി സ്കൂളിലേക്ക് പോകുന്ന വഴിയില് പാമ്പിനെ കണ്ടതോടെ ഏറെ പരിഭ്രാന്തിയിലായിരുന്നു കുട്ടികളും രക്ഷിതാക്കളും. റോഡിന് ഇരുവശവും വലിയ ഉയരത്തില് കാട് വളര്ന്നു നില്ക്കുന്നതിനാല് കാല്നടയാത്ര പോലും പ്രയാസകരമായിരുന്നു.
സന്നദ്ധ പ്രവർത്തകരായ റെജി ഇലവുനിൽക്കുന്നിൽ, സിനു ഇല്ലത്തുപറമ്പിൽ, ബീന ഇലവുനിൽക്കുന്നതിൽ, എബി ഇല്ലത്തുകാലായിൽ എന്നിവരുടെ നേതൃത്വത്തിലായിരുന്നു ശുചീകരണ പ്രവര്ത്തനം. കാട്ടുപന്നികളുടെയും ഇഴജന്തുക്കളുടെയും പ്രധാന താവളം കൂടിയായിരുന്നു ഈ റോഡ്. മഴക്കാലപൂർവ ശുചീകരണ പ്രവർത്തനം അടിയന്തിരമായി നടപ്പിലാക്കാൻ അധികൃതർ തയ്യാറാകണമെന്ന് പൊതു പ്രവർത്തകൻ വിൻസൻ തോമസ് ചിറക്കാല ആവശ്യപ്പെട്ടു.
