തിരുവനന്തപുരം: അധ്യയന വര്ഷം അവസാനിക്കാറായതോടെ വിദ്യാലയങ്ങളില് സെന്റ് ഓഫുകള് നടക്കുകയാണ് .ഈ സാഹചര്യത്തില് സെന്റ് ഓഫിനിടെയുണ്ടാവാന് സാധ്യതയുള്ള വിദ്യാര്ത്ഥികളുടെ കുറുമ്പുകളേക്കുറിച്ച് മുന്നറിയിപ്പുമായി പൊതുവിദ്യാഭ്യാസ ഡയറക്ടര് രംഗത്തെത്തി. മധ്യ വേനല് അവധിക്ക് സ്കൂളുകള് അടയ്ക്കുന്ന അവസാന ദിവസങ്ങളില് സ്കൂളിലെ ഫര്ണിച്ചറുകള്ക്കും മറ്റ് സാമഗ്രഹികള്ക്കും കേടുവരുത്താനോ നശിപ്പിക്കാനോ സാധ്യതയുണ്ടെന്നാണ് മുന്നറിയിപ്പ്. ഇത്തരം നടപടികള് കണ്ടാല് നഷ്ടപരിഹാരം ഈടാക്കണമെന്നും കര്ശന നടപടി സ്വീകരിക്കണമെന്നും മുന്നറിയിപ്പ് നല്കുന്നു.
എന്നാല് ഉത്തരവ് പല വിധ മുന്വിധികളോടെയുള്ളതാണെന്നാണ് വ്യാപക വിമര്ശനം. സെന്റ് ഓഫ് പരിപാടികള് പലപ്പോഴും കൈവിട്ട കളിയാവുന്ന സംഭവങ്ങള് ഉണ്ടായിട്ടുള്ള സംഭവങ്ങളുടെ പശ്ചാത്തലത്തിലാണ് ഉത്തരവ്. നേരത്തെ മികച്ച രീതിയിലും സ്നേഹപൂര്വമുള്ള അധ്യാപക വിദ്യാര്ഥി ബന്ധത്തിന്റെ അടയാളങ്ങളോടെയായിരുന്നു എല്ലായിടത്തും ഇത്തരം പരിപാടികള് സംഘടിപ്പിച്ചിരുന്നത്. ഈയിടെയായി പല സ്ഥാപനങ്ങളിലും വിടപറയല് പരിപാടി അധ്യാപകര്ക്ക് തലവേദന സൃഷ്ടിക്കുകയാണ്.
