ആറ്റിങ്ങല്: വാഹനത്തില് മാലിന്യം തള്ളാനെത്തിയവരെ കൈയോടെ പിടികൂടി നഗരസഭയും നാട്ടുകാരും. കെ.എസ്.ആര്.ടി.സി ഡിപ്പോക്ക് സമീപത്ത് തോപ്പില് ഇടവഴിയിലെ പുരയിടത്തിലാണ് അനധികൃതമായി മാലിന്യം തള്ളാന് ശ്രമം നടന്നത്. മാലിന്യവുമായി എത്തിയവരെയും വാഹനത്തെയും നാട്ടുകാര് പിടികൂടി നഗരസഭ ആരോഗ്യ വിഭാഗത്തിന് കൈമാറി.ആളൊഴിഞ്ഞ പുരയിടമായിരുന്നതിനാല് രാത്രിയിലും വെളുപ്പിനുമൊക്കെ ഇവിടെ മാലിന്യം കൊണ്ടുതള്ളുന്നത് പതിവായിരുന്നു.
നഗരസഭ നിര്ദേശാനുസരണം പ്രദേശത്ത് നാട്ടുകാരുടെ നിരീക്ഷണമുണ്ടായിരുന്നു. വ്യാഴാഴ്ച രാവിലെ 20ഓളം ചാക്കുകളില് നിറച്ച മാലിന്യം മിനിലോറിയില് കൊണ്ടുവന്ന് തള്ളാന് ശ്രമിക്കുന്നതിനിടയിലാണ് നാട്ടുകാര് വാഹനം തടഞ്ഞിട്ടത്. തുടര്ന്ന് വാര്ഡ് കൗണ്സിലര് ജി. ശങ്കര് നഗരസഭ ആരോഗ്യവിഭാഗത്തില് വിവരം അറിയിക്കുകയും അവരെത്തെത്തി ഡ്രൈവറെയും വാഹനത്തെയും പിടികൂടുകയും ചെയ്തു.നഗരസഭ പരിധിക്ക് വെളിയിലെ പാലമൂട് എന്ന സ്ഥലത്തുള്ള രാജേഷ് എന്ന വ്യക്തിയുടെ നിര്ദേശ പ്രകാരമാണ് ചാക്കുകെട്ടുകള് ഇവിടെ തള്ളാന് എത്തിയതെന്ന് ഡ്രൈവര് ആരോഗ്യവിഭാഗത്തിനോട് പറഞ്ഞു. പിടിച്ചെടുത്ത വാഹനം പിഴ ഈടാക്കിയശേഷം തുടര് നിയമനടപടിക്കായി പോലീസിന് കൈമാറുമെന്നും ഹെല്ത്ത് സൂപ്പര് വൈസര് ബി. അജയകുമാര് അറിയിച്ചു. 30ല് അധികം കുടുംബങ്ങളാണ് പ്രദേശത്ത് താമസിക്കുന്നത്. അറവ്- കോഴി മാലിന്യങ്ങള് ഉള്പ്പടെയുള്ളവ നിരന്തരം ഇവിടെകൊണ്ടുവന്നു തള്ളുകയാണ്.
മാലിന്യ ശേഖരണത്തിനും പരിപാലനത്തിനും നിരവധി സംവിധാനങ്ങളുള്ള പട്ടണം കൂടിയാണ് ആറ്റിങ്ങല്. 2018 മുതല് 2021 വരെയുള്ള കാലയളവില് മാലിന്യം പൊതുനിരത്തില് വലിച്ചെറിയുന്നതും വാഹനത്തില് കൊണ്ട് തള്ളിയതുമായ വിവിധ കേസുകളില് രണ്ട് ലക്ഷം രൂപയോളം പിഴ ചുമത്തി നിയമനടപടി സ്വീകരിച്ചിട്ടുണ്ട്.ഹെല്ത്ത് ഇന്സ്പെക്ടര് എസ്.എസ്. മനോജ്, ജൂനിയര് ഹെല്ത്ത് ഇന്സ്പെക്ടര്മാരായ ഷെന്സി, മുബാറക്ക് ഇസ്മായില് എന്നിവരുടെ സംഘമാണ് വാഹനം പിടികൂടിയത്.