എറണാകുളം : കൊച്ചിയില് മാലിന്യം തളളിയത് ചോദ്യം ചെയ്തയാളെ കാറിടിപ്പിച്ച് പരിക്കേല്പ്പിച്ചതായി പരാതി. കൊച്ചി കോര്പറേഷന് കൗണ്സിലര് സുജയുടെ ഭര്ത്താവ് ലോനപ്പന് നേരെയാണ് ആക്രമണം ഉണ്ടായത്. ഇവരുടെ പരാതിയില് പോലീസ് കേസെടുത്ത് അന്വേഷണം ആരംഭിച്ചു. മാലിന്യം തള്ളുന്നത് ശ്രദ്ധയില്പ്പെട്ട കൗണ്സിലര് സുജയുടെ ഭര്ത്താവ് ലോനപ്പന് കാറിലുണ്ടായിരുന്നവരെ തടഞ്ഞു. മാലിന്യം ഇവിടെ നിക്ഷേപിക്കരുതെന്നും തിരികെ എടുത്ത് കൊണ്ടു പോകണമെന്നും ആവശ്യപ്പെട്ടു. ഇതേത്തുടര്ന്നാണ് തനിക്ക് നേരെ ആക്രമണം ഉണ്ടായതെന്ന് ലോനപ്പന് പറയുന്നു.
ഈ ഭാഗത്ത് മാലിന്യം തള്ളുന്നത് പതിവാണെന്നും പരാതിയുണ്ട്. കടവന്ത്ര ജനത റോഡില് ഇന്നലെ രാത്രി പത്തുമണിയോടെയാണ് സംഭവം. കരുതിക്കൂട്ടിയുള്ള ആക്രമണമാണെന്നും കുറ്റക്കാരെ എത്രയും വേഗം നിയമത്തിന് മുന്നില് കൊണ്ടുവരണമെന്നും കൗണ്സിലര് സുജ ആവശ്യപ്പെട്ടു. കാറിന്റെ ഉടമയെ കണ്ടെത്തിയെങ്കിലും കാര് ഓടിച്ചത് ആരാണെന്ന് വ്യക്തമായിട്ടില്ല. സംഭവത്തിന്റെ സിസിടിവി ദൃശ്യം ശേഖരിച്ച് ഉടന് നടപടി സ്വീകരിക്കുമെന്ന് പോലീസ് അറിയിച്ചു.
