റാന്നി : പണം അടച്ച് വേണ്ടത്ര രേഖകള് ഹാജരാക്കിയിട്ടും കുടിവെള്ള കണക്ഷന് നല്കാത്ത സംഭവത്തില് നഷ്ട പരിഹാരം നല്കാന് കോടതി ഉത്തരവ്. വാട്ടര് അതോറിറ്റി പത്തനംതിട്ട അസി. എന്ജീനിയര് 10,000 രൂപ നഷ്ടപരിഹാരവും 5,000 രൂപ കോടതിച്ചെലവും നല്കണമെന്നാണ് ജില്ല ഉപഭോക്തൃ തര്ക്കപരിഹാര ഫോറത്തിന്റെ വിധി വന്നിരിക്കുന്നത് . ഓമല്ലൂര് പാറേക്കാട്ട് വീട്ടില് ബെന്നി എം. ബേബി വാട്ടര് അതോറിറ്റി ജില്ല ഉപഭോക്തൃ കോടതിയില് സമര്പ്പിച്ച ഹരജിയിലാണ് വിധി.
ഗാര്ഹിക ഉപയോഗത്തിന് വാട്ടര് കണക്ഷന് എടുക്കുന്നതിനായി അപേക്ഷഫോറവും 2,000 രൂപ മുടക്കി പഞ്ചായത്തില്നിന്ന് ലഭിച്ച മറ്റ് അനുബന്ധ സര്ട്ടിഫിക്കറ്റുകളും വാട്ടര് അതോറിറ്റി ഓഫിസില് ഹാജരാക്കിയെങ്കിലും കണക്ഷന് ലഭിക്കാന് താമസം നേരിട്ടു.
കാരണം അന്വേഷിച്ചപ്പോള് ബെന്നിയുടെ വീടിനു മുന്വശത്തുകൂടി പോകുന്ന പൈപ്പ് ലൈന് പട്ടികജാതി കോളനിയിലേക്കുള്ളതാണെന്നും ഈ പദ്ധതിയുടെ പൈപ്പില്നിന്ന് മറ്റ് വിഭാഗത്തില്പെട്ടവര്ക്ക് വെള്ളം നല്കാന് പറ്റില്ല എന്നുമുള്ള മറുപടിയാണ് നല്കിയത്. മതിയായ രേഖകളും ഫീസും വാങ്ങിയശേഷം അപേക്ഷ നിരാകരിച്ചത് സേവന വീഴ്ചയാണെന്ന് കോടതി നിരീക്ഷിച്ചു.
എന്ജിനീയര് കോടതിയില് ഹാജരായെങ്കിലും അപേക്ഷ നിരസിച്ചതിന് മതിയായ രേഖകള് ഹാജരാക്കാന് കഴിഞ്ഞിെല്ലന്ന് കോടതി ചൂണ്ടിക്കാട്ടി. ഗുരുതര സേവന വീഴ്ചയാണ് ഉണ്ടായതെന്നും കോടതി വിലയിരുത്തി.
അതിന്റെ അടിസ്ഥാനത്തില് ഒരു മാസത്തിനകം ബെന്നിക്ക് വാട്ടര് കണക്ഷന് നല്കണമെന്നും നഷ്ടപരിഹാരവും കോടതിച്ചെലവും നല്കണമെന്നും കോടതി വിധിച്ചു. ഉപഭോക്തൃ തര്ക്കപരിഹാര കമ്മീഷന് പ്രസിഡന്റ് ബേബിച്ചന് വെച്ചുച്ചിറ, അംഗങ്ങളായ എന്. ഷാജിത ബീവി, നിഷാദ് തങ്കപ്പന് എന്നിവര് ചേര്ന്നാണ് വിധി പ്രസ്താവിച്ചത്.
