കോന്നി : പുനലൂർ – മൂവാറ്റുപുഴ സംസ്ഥാന പാത നിർമ്മാണ പ്രവർത്തനങ്ങളുടെ ഭാഗമായി കോന്നി നഗരത്തിലെ പൈപ്പുകൾ പൊട്ടുന്നത് വൻ തോതിൽ കുടിവെള്ളം പാഴാകുന്നതിന് കാരണമാകുന്നു. കോന്നി നഗരത്തിലെ വിവിധ ഇടങ്ങളിൽ കുടിവെള്ള പൈപ്പ് ലൈനുകൾ പൊട്ടിയിട്ട് നാല് ദിവസങ്ങൾ കഴിഞ്ഞിട്ടും തകരാർ പരിഹരിക്കാൻ അധികൃതർ തയ്യാറായിട്ടില്ല. പല സ്ഥലങ്ങളിലും കലുങ്ക് നിർമ്മാണത്തിന്റെയും റോഡ് നിർമ്മാണത്തിന്റെയും പേരിൽ പൈപ്പ് ലൈനുകൾ പൊട്ടി റോഡിൽ ചെളിയും വെള്ളവും രൂപപ്പെട്ടിട്ടുണ്ട്.
പൈപ്പ് പൊട്ടൽ മൂലം കോന്നി പഞ്ചായത്തിന്റെ വിവിധ വാർഡുകളിൽ ജലവിതരണവും മുടങ്ങിയിട്ടുണ്ട്. കോന്നി ചന്ത ഭാഗം, കെ എസ് ആർ റ്റി സി ഓപ്പറേറ്റിംഗ് സ്റ്റേഷന് സമീപം, സെൻട്രൽ ജംഗ്ഷൻ എന്നിവിടങ്ങളിൽ എല്ലാം നിരവധി തവണ കുടിവെള്ള പൈപ്പുകൾ പൊട്ടിയിട്ടുണ്ട്. റോഡിൽ ചെളി വെള്ളം കെട്ടി കിടക്കുന്നത് കാൽനട യാത്രക്കാരെയും ഇരുചക്ര വാഹന യാത്രക്കാരെയും സാരമായി ബാധിക്കുന്നുണ്ട്.