മല്ലപ്പള്ളി : പൊതുമരാമത്ത് വകുപ്പ് റോഡിന്റെ നവീകരണ പ്രവൃത്തികൾ മൂലം മുടങ്ങിയ ജലവിതരണം പുനരാരംഭിക്കാൻ നടപടി ഉണ്ടാകണമെന്ന ആവശ്യം ശക്തO. മല്ലപ്പള്ളി ഞാലിക്കണ്ടം – മടുക്കോലി പൊതുമരാമത്ത് റോഡിന്റെ നവികരണ പ്രവൃത്തികൾ കാരണം പുതുശേരി മുതൽ കടമാൻകുളം വരെയുളള ഭാഗത്ത് ആഴ്ചകളായി ജലവിതരണം മുടങ്ങിയിട്ട്. 150 ഓളം വീട്ടുകാരാണ് ഇതുമൂലം കുടിവെളള കിട്ടാതെ ദുരിതം അനുഭവിക്കുന്നത്.
വർഷങ്ങൾ പഴക്കമുള്ള എ സി പൈപ്പ് നന്നാക്കാൻ കഴിയില്ലെന്നാണ് അറ്റകുറ്റപ്പണികൾക്ക് കരാറെടുത്തവർ പറയുന്നത്. പൊതുമരാമത്ത് വകുപ്പിന്റെയും വാട്ടർ അതോറിറ്റിയുടെയും ഏകോപനമില്ലാത്ത പ്രവർത്തനമാണ് ഇതിന് കാരണമെന്ന് നാട്ടുകാർ പറയുന്നു. 5.5 മീറ്റർ വീതിയിൽ ടാറിങ് ചെയ്യുന്നതിനാൽ നിലവിലുളള പൈപ്പ് ഇതിനടിയിലാകും. പിന്നിട് അറ്റകുറ്റപ്പണികൾക്ക് ശ്രമിച്ചാൽ ടാറിങ്ങിനും കേടുപാടുകൾ ഉണ്ടാകും. ഇതിന് മുൻപായി പതിറ്റാണ്ടുകൾ പഴക്കമുള്ള പൈപ്പുകൾ മാറ്റി പുതിയ പൈപ്പ് സ്ഥാപിക്കുകയോ അറ്റകുറ്റപ്പണികൾ നടത്തുകയോ ചെയ്ത് കുടിവെളള വിതരണം പുനരാരംഭിക്കാനുള്ള നടപടി ഉണ്ടാകണമെന്നാണ് പ്രദേശവാസികളുടെ ആവശ്യം.
