റാന്നി: കനത്ത മഴയിൽ റാന്നി ടൗണിൽ രൂപപ്പെട്ട രൂക്ഷമായ വെള്ളക്കെട്ടിൽ വ്യാപാരികളും നാട്ടുകാരും പരാതി ഉയർന്നതിനെ തുടർന്ന് കെ.എസ്.ടി.പി ഉദ്യോഗസ്ഥർ സ്ഥലം സന്ദർശിച്ചു. ടൗണിലെ ഓടകളിൽ അടിഞ്ഞുകൂടിയ മണ്ണും മാലിന്യങ്ങളും ഉടനടി നീക്കം ചെയ്ത് വെള്ളക്കെട്ടിന് പരിഹാരം കാണുമെന്ന് പരിശോധനയ്ക്ക് ശേഷം ഉദ്യോഗസ്ഥർ ഉറപ്പുനൽകി. പുനലൂർ – മൂവാറ്റുപുഴ സംസ്ഥാന പാതയുടെ നിർമ്മാണം പൂർത്തിയായതിന് ശേഷം ആദ്യമായാണ് റാന്നി ടൗണിൽ ഓട വൃത്തിയാക്കുന്നതിനുള്ള നടപടികൾ ആരംഭിക്കുന്നത്.
കഴിഞ്ഞ ദിവസങ്ങളിൽ പെയ്ത കനത്ത മഴയിൽ ടൗണിലെ ഓടകൾ കവിഞ്ഞൊഴുകുകയും സമീപത്തെ നിരവധി കടകളിൽ വെള്ളം കയറുകയും ചെയ്തിരുന്നു. ഇത് വലിയ സാമ്പത്തിക നഷ്ടത്തിനും ദുരിതത്തിനും ഇടയാക്കിയതോടെയാണ് വ്യാപാരികളും നാട്ടുകാരും പ്രതിഷേധവുമായി രംഗത്തെത്തിയത്. ഓടകളിൽ അടിഞ്ഞുകൂടിയ മണ്ണ് യന്ത്രസഹായത്തോടെ എത്രയും വേഗം നീക്കം ചെയ്ത് നീരൊഴുക്ക് സുഗമമാക്കാനാണ് അധികൃതർ തീരുമാനിച്ചിരിക്കുന്നത്. നടപടി വേഗത്തിലാകുമെന്ന പ്രതീക്ഷയിലാണ് പ്രദേശവാസികളും വ്യാപാരികളും.
