പുല്ലാട് : പൂവത്തൂർ റോഡിൽ കോയിപ്രം പോലീസ് സ്റ്റേഷനുസമീപം റോഡിൽ വെള്ളക്കെട്ട്. റോഡിന് സമീപത്തെ തോട്ടിലെ ഒഴുക്ക് തടസ്സപ്പെടുത്തി വൈദ്യുതത്തൂൺ. തോടിന്റെ അരികിൽ നിൽക്കുന്ന 11 കെവി ലൈൻ ഉൾപ്പെടെ വലിച്ചിട്ടുള്ള വൈദ്യുതത്തൂണിനെ താങ്ങിനിർത്തുന്നതിനു വേണ്ടിയുള്ള തൂണിന്റെ ചുവട് തോടിന് കുറുകേയാണ് സ്ഥാപിച്ചിട്ടുള്ളത്. നേരത്തേ ആറുമീറ്റർ വീതിയുണ്ടായിരുന്ന തോട് കൈയ്യേറ്റത്തെ തുടർന്നാണ് ഒന്നര മീറ്ററിലേക്ക് ചുരുങ്ങിയത്. തോട്ടിൽ സ്ഥാപിച്ചിരിക്കുന്ന തൂണിന്റെ ചുവട്ടിൽ മഴവെള്ളത്തിനൊപ്പം ഒഴുകിവരുന്ന മാലിന്യം അടിഞ്ഞുകൂടി വെള്ളം ഒഴുക്കിനെ തടസ്സപ്പെടുത്തുന്നുണ്ട്.
ഒഴുക്ക് തടസ്സപ്പെടുമ്പോൾ വെള്ളം തോടുകവിഞ്ഞ് റോഡിലൂടെയാണ് ഒഴുകുന്നത്. വെള്ളം ഒഴുകിച്ചെന്ന് പോലീസ് സ്റ്റേഷന്റെ കവാടത്തിന് മുമ്പിലാണ് കെട്ടിക്കിടക്കുന്നത്. സ്റ്റേഷനിൽ എത്തുന്നവർക്ക് വെള്ളക്കെട്ടിൽ വേണം വാഹനം നിർത്തിയിടാൻ. സ്കൂൾ കുട്ടികൾ അടക്കമുള്ളവർ വെള്ളക്കെട്ടിലൂടെ നടന്നാണ് പോകുന്നത്. തോടിന്റെ പഴയ വീതി പുനഃസ്ഥാപിക്കുകയോ റോഡ് ഉയർത്തുകയോ ചെയ്താൽമാത്രമേ വെള്ളക്കെട്ടിന് ശാശ്വത പരിഹാരം ഉണ്ടാവുകയുള്ളൂ.
