വൈത്തിരി : വയനാട് ചുരത്തിൽ ഏഴാം വളവിന് സമീപം ചരക്ക് ലോറി നിയന്ത്രണം വിട്ട് അപകടം. ഏറെ നേരം ഗതാഗതം മുടങ്ങി. ഇന്ന് ഉച്ചയോടെയാണ് സംഭവം. നിറയെ മാർബിളും കയറ്റി വരികയായിരുന്ന ലോറിയാണ് അപകടത്തിൽപെട്ടത്. വാഹനത്തിന്‍റെ പകുതി റോഡിലും മുൻഭാഗം ഗർത്തത്തിലേക്ക് തൂങ്ങിക്കിടക്കുന്ന നിലയിലുമാണുള്ളത്. ആർക്കും പരിക്കില്ല. പോലീസും ചുരം സംരക്ഷണസമിതിയും സ്ഥലത്തെത്തി ക്രെയിൻ ഉപയോഗിച്ച് ലോറി നീക്കാനുള്ള ശ്രമം തുടരുകയാണ്.
