എടപ്പാള്‍: പണത്തിന്റെ അഹങ്കാരത്തില്‍ ജാഗ്രതാ നിര്‍ദ്ദേശങ്ങള്‍ ലംഘിച്ച് ആഢംബര വിവാഹം. കോഴി ബിരിയാണിയും വെട്ടിമൂടി ഓഡിറ്റോറിയം താഴിട്ട് പൂട്ടി പോലീസും ആരോഗ്യവകുപ്പും.
എടപ്പാളിനു സമീപം പടിഞ്ഞാറങ്ങാടിയില്‍ പണത്തിന്റെ ഹുങ്കില്‍ കല്യാണം നടത്തിയ വീട്ടുകാരാണ് അതിഥികളുടെ മുമ്പില്‍ നാണംകെട്ടത്. മണ്ഡപങ്ങളില്‍ കല്യാണം അനുവദിക്കരുതെന്ന നിര്‍ദേശമൊന്നും വകവെയ്ക്കാന്‍ ഇദ്ദേഹം തയ്യാറായില്ല. മണ്ഡപത്തിന്റെ നടത്തിപ്പുകാരോടും തട്ടിക്കയറി. എന്തുവന്നാലും കല്യാണം കെങ്കേമമായി തന്നെ നടത്തു മെന്നായിരുന്നു അദ്ദേഹത്തിന്റെ വാശി.
കല്ല്യാണത്തില്‍ വിദേശത്ത് നിന്നു വന്നവര്‍ അടക്കം പങ്കെടുത്തതിനെ തുടര്‍ന്നാണ് ജനങ്ങള്‍ ആരോഗ്യ വകുപ്പിനെയും പോലീസിനെയും വിവരം അറിയിച്ചത്. കൊറോണ പടര്‍ന്നുപിടിക്കുന്ന സാഹചര്യത്തില്‍ ജില്ലാഭരണകൂടം നല്‍കുന്ന നിര്‍ദേശങ്ങള്‍ എല്ലാവരും പാലിക്കുമ്പോഴാണ് ചിലര്‍ പണത്തിന്റെ ഹുങ്കില്‍ എന്തും ചെയ്യാമെന്ന ധാരണയില്‍ പ്രവര്‍ത്തിക്കുന്നത്. ആരോഗ്യവകുപ്പും പോലീസും കൃത്യ സമയത്ത് ഇടപെട്ടതിനാല്‍ വലിയൊരു രോഗവ്യാപന സാധ്യത ഇല്ലാതാക്കാനായി.
