ജയ്പൂര്‍ : രാജസ്ഥാനില്‍ വിവാഹസംഘം സഞ്ചരിച്ച കാര്‍ നദിയിലേക്ക് മറിഞ്ഞ് വരന്‍ ഉള്‍പ്പെടെ ഒമ്പതുപേര്‍ മരിച്ചു. ഞായറാഴ്ച രാവിലെ 8.30ന് രാജസ്ഥാനിലെ കോട്ട ജില്ലയിലാണ് സംഭവം. ചമ്പല്‍ നദിയിലേക്ക് കാര്‍ മറിഞ്ഞാണ് അപകടം. ചൗത് കാ ബര്‍വാഡയില്‍ നിന്ന് ഉജ്ജയിനിലേക്ക് പോകുകയായിരുന്ന വിവാഹ സംഘമാണ് അപകടത്തില്‍ പെട്ടത്. അപകടം നടന്നയുടന്‍ പോലിസും അഗ്‌നിശമന സേയും സ്ഥലത്തെത്തി രക്ഷാപ്രവര്‍ത്തനം നടത്തി.
ക്രെയിന്‍ ഉപയോഗിച്ച്‌ കാര്‍ പുഴയില്‍ നിന്ന് ഉയര്‍ത്തിയെടുത്തു. ഏഴു മൃതദേഹങ്ങള്‍ കാറിനകത്ത് നിന്നും രണ്ട് മൃതദേഹങ്ങള്‍ നദിയില്‍ നിന്നുമാണ് കോട്ട മുനിസിപ്പല്‍ കോര്‍പറേഷന്‍ രക്ഷാപ്രവര്‍ത്തകര്‍ കണ്ടെടുത്തതെന്ന് പോലിസ് സൂപ്രണ്ട് കേസര്‍ സിങ് ഷെഖാവത്ത് അറിയിച്ചു. മൃതദേഹങ്ങള്‍ പോസ്റ്റമോര്‍ട്ടത്തിനയച്ചിരിക്കുകയാണ്. അപകടത്തില്‍ മരിച്ചവരുടെ ബന്ധുക്കള്‍ക്ക് മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് സഹായം അനുവദിക്കുമെന്ന് ജില്ലാ കളക്ടര്‍ ഹരിമോഹന്‍ മീണ പറഞ്ഞു.
