കുട്ടനാട് : പാടശേഖരങ്ങളില്‍ വെള്ളം വറ്റിക്കുന്നതിനുള്ള വൈദ്യുതി ചാര്‍ജ് പാടശേഖര സമിതികളുടെ അക്കൗണ്ട്‌ വഴിയാക്കാനുള്ള കൃഷിവകുപ്പിന്റെ നീക്കം വിവാദത്തിലേക്ക്. വൈദ്യുതി ചാര്‍ജ് കൃഷിവകുപ്പ് വൈദ്യുതി വകുപ്പിന് നേരിട്ട് അടയ്‌ക്കുന്നതാണ് നിലവിലുള്ള രീതി. ഇത് തകിടം മറിയ്‌ക്കുന്നത് കൃഷിക്കുണ്ടാകുന്ന വൈദ്യുതി ചെലവ് മുഴുവന്‍ തങ്ങളില്‍ നിന്ന് ഈടാക്കാനുള്ള ഗൂഢാലോചനയുടെ ഭാഗമാണെന്ന് ആരോപിച്ച്‌ കര്‍ഷകരും പാടശേഖരസമിതികളും പ്രതിഷേധത്തിലാണ്.
കൃഷിവകുപ്പ് അടുത്തിടെ കൊണ്ടുവരുന്ന പരിഷ്‌കാരങ്ങളെല്ലാം തങ്ങള്‍ക്ക് വന്‍ സാമ്പത്തിക ബാദ്ധ്യത അടിച്ചേല്‍പ്പിക്കുന്നതാണെന്ന് കര്‍ഷകര്‍ പറയുന്നു. മുന്‍കാലങ്ങളില്‍ കൃഷിക്ക് വൈദ്യുതി നല്‍കിയതിന്റെ ഭാഗമായി കൃഷിവകുപ്പിനുള്ള ബാദ്ധ്യത ഇതുവരെ സര്‍ക്കാര്‍ ഒഴിവാക്കിയിട്ടില്ല. ഈ സാഹചര്യത്തില്‍ കൃഷിവകുപ്പില്‍ നിന്ന് പണം അക്കൗണ്ടില്‍ എത്താന്‍ വൈകിയാല്‍ വൈദ്യുതി ചാര്‍ജിന്റെ ബാദ്ധ്യത പാടശേഖര സമിതിയുടെ തലയിലാകുമെന്നാണ് ആശങ്ക.
