സ്ത്രീകളില് അവരുടെ പ്രത്യുല്പാദനത്തിന്റെ ഭാഗമായി നടക്കുന്ന ഒരു സ്വാഭാവിക പ്രക്രിയയാണ് ആര്ത്തവം. ആര്ത്തവ സംബന്ധമായ നിരവധി പ്രശ്നങ്ങള് പലരേയും അലട്ടാം. മിക്ക സ്ത്രീകളും ആര്ത്തവം വൈകുന്നതും ആര്ത്തവത്തോടനുബന്ധിച്ചുള്ള ആരോഗ്യപ്രശ്നങ്ങളുമുള്ളവരാണ്. ജീവിതശൈലിയിലെ ചില മാറ്റങ്ങളാണ് ആര്ത്തവം ക്രമം തെറ്റുന്നതിന് പിന്നിലെ ചില കാരണങ്ങള്. അമിത സമ്മര്ദ്ദം ശരീരത്തില് കോര്ട്ടിസോള് എന്ന ഹോര്മോണ് പുറത്തുവിടാന് കാരണമാകുന്നു. ഇത് ആര്ത്തവചക്രത്തെ ബാധിക്കുകയും ഹോര്മോണ് അസന്തുലിതാവസ്ഥയിലേക്ക് നയിക്കുകയും ചെയ്യുന്നു. ഇത് ക്രമരഹിതമായ ആര്ത്തവചക്രം ഉണ്ടാക്കുകയോ ആര്ത്തവം വൈകിപ്പിക്കുകയോ ചെയ്യുന്നുവെന്ന് ഗുരുഗ്രാമിലെ സികെ ബിര്ള ഹോസ്പിറ്റലിലെ ഗൈനക്കോളജിസ്റ്റായ ഡോ അരുണ കല്റ പറയുന്നു. നിങ്ങള് അമിതമായി വ്യായാമം ചെയ്യുകയാണെങ്കില് ജാഗ്രത പാലിക്കണം. കാരണം അമിതമായ വ്യായാമം ആര്ത്തവചക്രത്തില് മാറ്റങ്ങള്ക്ക് കാരണമാകും. ആര്ത്തവം വൈകുന്നതിലേക്ക് നയിച്ചേക്കാം.
ഹോര്മോണ് അസന്തുലിതാവസ്ഥ പ്രത്യേകിച്ച് ഈസ്ട്രജന്, പ്രൊജസ്ട്രോണ് എന്നീ ഹോര്മോണുകള് ഉള്പ്പെടുന്നവ, ആര്ത്തവ ക്രമക്കേടുകളുടെ ഒരു സാധാരണ കാരണമായി അറിയപ്പെടുന്നു. ഈ ഏറ്റക്കുറച്ചിലുകള് ആര്ത്തവത്തിന്റെ സമയം, ദൈര്ഘ്യം, തീവ്രത എന്നിവയെ ബാധിക്കും. കൂടാതെ ഹോര്മോണ് അസന്തുലിതാവസ്ഥ മലബന്ധം, വയറിളക്കം, മാനസികാവസ്ഥയിലെ മാറ്റങ്ങള് തുടങ്ങിയ നിരവധി ലക്ഷണങ്ങളിലേക്ക് നയിച്ചേക്കാമെന്നും പഠനത്തില് പറയുന്നു. ഭാരം കൂടുകയോ കുറയുകയോ ചെയ്യുന്നത് ഹോര്മോണ് സിന്തസിസിനെ ബാധിച്ചേക്കാം. ഇത് ക്രമരഹിതമായ ആര്ത്തവത്തിന് കാരണമാകുന്നതായി എന്ഡോക്രൈനോളജി ആന്ഡ് മെറ്റബോളിസം ജേണലില് പ്രസിദ്ധീകരിച്ച പഠനത്തില് പറയുന്നു. തൈറോയ്ഡ് തകരാറുകള്, പ്രത്യുല്പാദന പ്രശ്നങ്ങള്, പോളിസിസ്റ്റിക് ഓവേറിയന് സിന്ഡ്രോം (പിസിഒഎസ്) എന്നിവയുള്പ്പെടെയുള്ള പല രോഗാവസ്ഥകളും ആര്ത്തവ ക്രമക്കേടുകളോ കാലതാമസമോ ഉണ്ടാകാന് കാരണമാകുമെന്ന് വിദഗ്ധര് പറയുന്നു.