റാന്നി : അപകടങ്ങള് ഒഴിവാക്കാൻ വീതി കൂട്ടിയ കലുങ്ക് യാത്രക്കാർക്ക് ഭീഷണിയാകുന്നു. റാന്നി – അത്തിക്കയം റോഡില് കരികുളത്തിനും കക്കുടുമണ്ണിനും ഇടയിലുള്ള ഭാഗത്താണ് പുതിയ അപകട കെണി രൂപപ്പെട്ടിരിക്കുന്നത്. റോഡ് നവീകരണത്തിന്റെ ഭാഗമായി പഴയ കലുങ്കിനോട് ചേർന്ന് പുതിയതായി കലുങ്ക് പണിത ഭാഗത്താണ് കുഴി രൂപപ്പെട്ടിരിക്കുന്നത്. കലുങ്കിനോട് ചേർന്നുള്ള ഭാഗത്തെ ടാറിംഗ് ഇടിഞ്ഞു താഴ്ന്ന നിലയിലാണ്. രാത്രികാലങ്ങളില് ഈ കുഴി ശ്രദ്ധയില്പ്പെടാതെ വാഹനങ്ങള് അപകടത്തില്പ്പെടാൻ സാദ്ധ്യത ഏറെയാണ്.
അപകടം ഒഴിവാക്കുന്നതിനായി നാട്ടുകാർ ചേർന്ന് കുഴിയില് കല്ലുകളും ചെടികളും വെച്ച് താത്കാലികമായി അടയാളപ്പെടുത്തിയിരിക്കുകയാണ്. ബസ് ഉള്പ്പെടെയുള്ള വലിയ വാഹനങ്ങള് കടന്നുപോകുമ്പോള് വശങ്ങളിലേക്ക് ഒതുക്കിയാല് കുഴിയില് വീഴാൻ സാദ്ധ്യത കൂടുതലാണ്. രാത്രികാലങ്ങളില് ഈ ഭാഗത്ത് ആവശ്യത്തിന് വെളിച്ചമില്ലാത്തത് ഇരുചക്ര വാഹന യാത്രക്കാർക്ക് ഭീഷണിയാണ്. ഈ വിഷയത്തില് അടിയന്തിര പരിഹാരം ഉണ്ടാകണമെന്ന് നാട്ടുകാര് അധികൃതരോട് ആവശ്യപ്പെട്ടു.
