27.5 C
Pathanāmthitta
Thursday, June 16, 2022 6:20 pm

കാട് വിട്ട് നാട്ടിലിറങ്ങുന്ന കാട്ടാനകളെ കൊണ്ടു പൊറുതിമുട്ടി ഒരു ഗ്രാമം

റാന്നി : കാട് വിട്ട് നാട്ടിലിറങ്ങുന്ന കാട്ടാനകളെ കൊണ്ടു പൊറുതിമുട്ടി ഒരു ഗ്രാമം. ജനവാസ മേഖലയിലെ കൃഷികള്‍ വ്യാപകമായി നശിപ്പിച്ച കാട്ടാനകള്‍ വടശേരിക്കര – ചിറ്റാര്‍ റോഡിലെ ബൗണ്ടറി ജംങ്ഷനിലുമെത്തി. പഴമക്കാരുടെ ഓര്‍മ്മയില്‍ ആദ്യമായിട്ടാണ് കാട്ടാന വനാതിര്‍ത്തിയില്‍ നിന്നും കിലോമീറ്ററുകള്‍ ദൂരമുള്ള ബൗണ്ടറി ജംങ്ഷനിലെത്തുന്നത്. ജനവാസ മേഖലകളായ പേഴുംപാറയിലും ഒളികല്ലിലും കാട്ടാന ശല്യം രൂക്ഷമാണ്. ഇപ്പോള്‍ ബൗണ്ടറിയിലേക്കും കാട്ടാന എത്തിയതോടെ കര്‍ഷകര്‍ കടുത്ത ആശങ്കയിലായി. കഴിഞ്ഞ ദിവസം പുലര്‍ച്ചെയാണ് കാട്ടാന എത്തിയത്. ചരിവുപറമ്പില്‍ തോമസ് ദാനിയേല്‍, മംഗലത്തുമണ്ണില്‍ മോനി എന്നിവരുടെ കൃഷിയിടങ്ങളില്‍ വ്യാപക നാശം വരുത്തിയിട്ടാണ് ആന കാടു കയറിയത്.

കായ്ഫലമുള്ള തെങ്ങുകള്‍ വ്യാപകമായി പിഴുതുമറിച്ചു. വാഴ, കപ്പ, ചേമ്പ് തുടങ്ങിയ വിളകളും ചവിട്ടി മെതിച്ചു കളഞ്ഞിട്ടുണ്ട്. പ്ലാവുകളില്‍ നിന്നും ചക്കകള്‍ തള്ളിയിട്ടും നശിപ്പിച്ചാണ് ആനകള്‍ കാടുകയറിയത്. കയ്യാലകളും മതിലുകളും ഇടിച്ചിട്ടാണ് വസ്തുവിലേക്ക് ആന എത്തുന്നത്. ചക്കകള്‍ പഴുത്തതോടെ ഇതിന്റെ മണം പിടിച്ചാണ് ആനയെത്തുന്നതെന്നാണ് വനപാലകര്‍ പറയുന്നത്. വനാതിര്‍ത്തിയില്‍ സൗരോര്‍ജ്ജ വേലി സ്ഥാപിക്കാറുണ്ടെങ്കിലും ഇതു ഫലപ്രദമാകുന്നില്ലെന്നാണ് ആക്ഷേപം. ഇവിടെ വനാതിര്‍ത്തി പങ്കിടുന്നിടത്ത് റബ്ബര്‍ കൃഷിയാണുള്ളത്. അവിടം പിന്നിട്ട് ആനകള്‍ നാട്ടിലെത്തുന്നത് ജനങ്ങളില്‍ ഭീതി ഉളവാക്കിയിട്ടുണ്ട്.

- Advertisment -
- Advertisment -
Advertisment
- Advertisment -

Most Popular