പത്തനാപുരം : കാട്ടുപോത്ത്, മാന്‍, മ്ലാവ്, പന്നി, മുള്ളന്‍പന്നി എന്നിവയെ വേട്ടയാടി ഇറച്ചി വില്പന നടത്തിവന്ന ആറംഗ സംഘത്തിലെ മൂന്നുപേരെ വനം വകുപ്പ് അധികൃതര്‍ പിടികൂടി. കഴുതുരുട്ടി വെഞ്ചര്‍ എസ്റ്റേറ്റില്‍ ശേഖര്‍ (25). ഇസ്ഫീല്‍ഡ് എസ്റ്റേറ്റ് ഡിവിഷന്‍ 2 ല്‍ ഷെമീര്‍ (34), ഉറുകുന്ന് വാലുതുണ്ടില്‍ ജോബിന്‍ ജോയ് (32) എന്നിവരാണ് നൈറ്റ് പട്രോളിംഗിനിടെ വലയില്‍ കുടുങ്ങിയത്.
കാട്ടുപോത്ത്, മ്ലാവ്, മുള്ളന്‍പന്നി എന്നിവയുടെ തലയോട്ടിയും അവശിഷ്ടങ്ങളും നാടന്‍ തോക്ക്, തിരകള്‍, വെടിമരുന്ന് എന്നിവയും കണ്ടെത്തി. പ്രതികള്‍ ഉപയോഗിച്ചിരുന്ന ഇരുചക്ര വാഹനവും പിടികൂടി. ജീപ്പ് കണ്ടെത്താനുണ്ട്. പ്രതികളെ അച്ചന്‍കോവില്‍ വനമേഖലയില്‍ തെളിവെടുപ്പ് നടത്തിയപ്പോഴാണ് കൂടുതല്‍ തൊണ്ടിമുതലുകള്‍ ലഭിച്ചത്. കാട്ടുപോത്തിന്റെ 1,500 കിലോയില്‍ അധികം വരുന്ന അവശിഷ്ടം പിടിച്ചെടുത്തു. കിലോയ്ക്ക് അറുന്നൂറിലധികം രൂപയ്ക്കാണ് ഇറച്ചി വില്പന നടത്തിയിരുന്നത്.
