ശ്രീകണ്ഠപുരം: ചന്ദനക്കാംപാറയിലെ ജനവാസ മേഖലയില് വീണ്ടും കാട്ടാനക്കൂട്ടമെത്തി കൃഷി നശിപ്പിച്ചു. കഴിഞ്ഞ രണ്ടു ദിവസം രാത്രിയും പുലര്ച്ചയുമെത്തിയ പത്തോളം ആനകളാണ് വ്യാപകമായി കൃഷി നശിപ്പിച്ചത്. ചന്ദനക്കാംപാറ മഠം മുക്കണ്ണി റോഡിലാണ് ആനകള് എത്തിയത്.ദേവസ്യ മുല്ലൂര്, മരങ്ങാട്ട് രാജു, മുളക്കല് ജോസ്, താളപ്പനാനി രാജു, കാളിയാനിയില് ജോസ് എന്നിവരുടെ വിളകള് നശിപ്പിച്ചു. തെങ്ങ്, കവുങ്ങ്, കൈതച്ചക്ക, വാഴ, ചേമ്പ്തുടങ്ങിയ വിളകളാണ് നശിപ്പിച്ചത്. കഴിഞ്ഞ രണ്ടാഴ്ചയായി ആടാംപാറയിലും ചന്ദനക്കാംപാറയിലും ശല്യം രൂക്ഷമായിരുന്നു. ബുധനാഴ്ച ആടാംപാറയിലെ വനാതിര്ത്തിയോടുചേര്ന്ന തോട്ടില് കാട്ടാനക്കുട്ടിയെ ചെരിഞ്ഞനിലയില് കണ്ടെത്തിയിരുന്നു. ജനവാസ മേഖലയില്നിന്ന് തിരികെ പോകുന്നിടെയാണ് കാട്ടാനക്കുട്ടി തോട്ടില്വീണ് ചെരിഞ്ഞത്.
കൂട്ടത്തോടെ എത്തുന്ന കാട്ടാനകളെ നേരിടാന് ഒരു മാര്ഗവുമില്ലാതെ ദുരിതമനുഭവിക്കുകയാണ് കര്ഷകര്. നേരത്തെ ആടാം പാറയില്നിന്ന് കാഞ്ഞിരക്കൊല്ലിയിലേക്ക് ആറ് കിലോമീറ്റര് നീളത്തില് സൗരോര്ജ വേലി നിര്മിച്ചിരുന്നെങ്കിലും കാട്ടാന ശല്യം പൂര്ണമായും ഇല്ലാതാക്കാന് കഴിഞ്ഞിരുന്നില്ല. ഏറെക്കാലമായി കാഞ്ഞിരക്കൊല്ലി, വഞ്ചിയം, ആടാംപാറ, അരീക്കാമല, ശാന്തിനഗര്, ചന്ദനക്കാംപാറ, ചിറ്റാരി, ഏലപ്പാറ, ചീത്തപ്പാറ, ഒന്നാം പാലം തുടങ്ങിയ മേഖലയിലുള്ളവര് കാട്ടാനശല്യം മൂലം പൊറുതിമുട്ടുകയാണ്.ആനയെ ഭയന്ന് രാത്രി പുറത്തിറങ്ങാന് കഴിയുന്നില്ലെന്ന് ഇവര് പറയുന്നു. എല്ലാ മേഖലയിലും സുരക്ഷാവേലികളൊരുക്കി വന്യമൃഗശല്യത്തിന് ഉടന് ശാശ്വത പരിഹാരം കാണണമെന്നാണ് പ്രദേശവാസികളുടെ ആവശ്യം.