പുല്‍പള്ളി: തിങ്കളാഴ്ച പുലര്‍ച്ച മൂഴിമലയില്‍ കൃഷിയിടത്തില്‍ കടന്ന കാട്ടാനകള്‍ ആക്രമിച്ചതിനെ തുടര്‍ന്ന് രണ്ടുപേര്‍ക്ക് പരിക്ക്. കോതാട്ടുകാലായില്‍ ബാബു, വേട്ടക്കുന്നേല്‍ സെലിന് എന്നിവര്‍ക്കാണ് പരിക്കേറ്റത്. കൃഷിയിടത്തില്‍ ആന കയറിയത് അറിയാതെ വീടിന് പുറത്ത് ഇറങ്ങിയവരെയാണ് കാട്ടാനകള്‍ ആക്രമിച്ചത്. ആന കൃഷിയിടത്തിലിറങ്ങിയെന്ന് പുലര്‍ച്ച സമീപവാസികള്‍ അറിയിച്ചതിനെ തുടര്‍ന്ന് വീടിനു പുറത്തിറങ്ങിയ ബാബു വീടിന് സമീപത്തുകൂടി രണ്ട് ആനകള്‍ പോകുന്നതു കണ്ട് അതിനു പിറകെ നടക്കുമ്പോഴാണ് ഈ കൂട്ടത്തിലുണ്ടായിരുന്ന കൊമ്പനാന ഇയാള്‍ക്കു പിറകെ എത്തിയത്. ആനകളെ കൃഷിയിടത്തില്‍നിന്ന് ഓടിക്കാന്‍ ശ്രമിക്കുന്നതിനിടെ കൊമ്പന്‍ പിന്നില്‍നിന്ന് വന്നത് ബാബു കണ്ടില്ല.
ആനയുടെ മുമ്പില്‍നിന്ന് രക്ഷപെടാനുള്ള ശ്രമത്തിനിടയില്‍ വീണ ബാബുവിന്റെ കാലുകള്‍ക്കും കൈക്കും പരിക്കേറ്റിട്ടുണ്ട്. ആന ബാബുവിനെ ഓടിക്കുന്നതു കണ്ട പരിസരവാസികള്‍ ഉച്ചത്തില്‍ ശബ്ദമുണ്ടാക്കുകയായിരുന്നു. ഇതുകൊണ്ടുമാത്രമാണ് ആന ഇയാളെ ആക്രമിക്കാതെ പോയത്. ശബ്ദം കേട്ട് പരിസരവാസികളായ ജോസുകുഞ്ഞും ഭാര്യ സെലിനും വീടിനു പുറത്തിറങ്ങി സമീപത്തെ റോഡില്‍ രണ്ടാനകള്‍ കൃഷിയിടത്തില്‍നിന്ന് ഇറങ്ങിപ്പോകുന്നത് കണ്ടു. ഇതു ശ്രദ്ധിച്ചു കൊണ്ടിരിക്കുമ്പോള്‍ പിന്നില്‍നിന്ന് മറ്റൊരു കൊമ്പനാന തങ്ങള്‍ക്കുനേരെ വരുന്നത് ഇവരറിഞ്ഞില്ല. ഈ ആനയാണ് ദമ്പതികളെ ഓടിച്ചത്. ഓടുന്നതിനിടയില്‍ വീണാണ് സെലിന് പരിക്കേറ്റത്. സെലിന് ആനയുടെ മുന്നില്‍നിന്ന് നിസ്സാര പരിക്കുകളോടെ കഷ്ടിച്ച്‌ രക്ഷപെടുകയായിരുന്നു.
കഴിഞ്ഞ കുറേ ദിവസങ്ങളായി മൂന്നാനകള്‍ ഈ മേഖലയില്‍ കൃഷിയിടങ്ങളില്‍ ഇറങ്ങി വ്യാപകമായ നാശനഷ്ടങ്ങള്‍ വരുത്തുന്നുണ്ട്. തിങ്കളാഴ്ച പുലര്‍ച്ച ആറിനാണ് പ്രദേശത്ത് ആനകളിറങ്ങിയത്. പ്രദേശത്തെ നിരവധി കര്‍ഷകരുടെ കൃഷിയിടങ്ങളില്‍ ആനകള്‍ വലിയ നാശനഷ്ടങ്ങള്‍ വരുത്തി. ബേബി കോതാട്ടുകാലായില്‍, ഭാസ്കരന്‍ കുടിലില്‍, ഓമന കുടിലില്‍, ബിനു പേരുക്കുന്നേല്‍ തുടങ്ങിയ നിരവധി കര്‍ഷകരുടെ കൃഷിയിടങ്ങളില്‍ നൂറുകണക്കിനു വാഴകള്‍, തെങ്ങ്, കമുക് തുടങ്ങിയ വിളകള്‍ ആനക്കൂട്ടം തിന്നും ചവിട്ടിയും നശിപ്പിച്ചു.
ഏതാനും മാസങ്ങള്‍ക്കു മുമ്പ് ഇവിടെ ഒരു ആദിവാസി സ്ത്രീ കാട്ടാനയുടെ ആക്രമണത്തില്‍ കൊല്ലപ്പെട്ടിരുന്നു. ഈ മേഖലയില്‍ വനാതിര്‍ത്തിയിലെ പ്രതിരോധ കിടങ്ങുകളും വൈദ്യുതവേലികളുമൊന്നും പ്രവര്‍ത്തനക്ഷമമല്ല. ഇത് ആനകള്‍ക്ക് നിര്‍ബാധം കൃഷിയിടങ്ങളില്‍ കയറാന്‍ സഹായകമാകുന്നു. വനാതിര്‍ത്തിയിലെ പ്രതിരോധ സംവിധാനങ്ങള്‍ ശക്തമാക്കണമെന്ന് നാട്ടുകാര്‍ നിരന്തരം ആവശ്യപ്പെടുന്നുണ്ടെങ്കിലും വനംവകുപ്പ് ഇക്കാര്യത്തില്‍ നിസ്സംഗത പുലര്‍ത്തുകയാണ്.
