കോഴഞ്ചേരി : രാജ്യത്തെ കർഷകരെ കൊള്ളയടിക്കുന്ന തരത്തിൽ കേന്ദ്ര സർക്കാർ വരുത്തിയ ഭീമമായ രാസവള വില വർദ്ധനവ് അടിയന്തരമായി പിൻവലിക്കണമെന്ന് ആവശ്യപ്പെട്ട് അഖിലേന്ത്യാ കിസാൻ സഭ പത്തനംതിട്ട ജില്ലാകമ്മിറ്റിയുടെ നേതൃത്വത്തില് കോഴഞ്ചേരി പോസ്റ്റ് ഓഫീസിലേക്ക് മാർച്ച് നടത്തി. സംസ്ഥാന സെക്രട്ടറി എ.പി ജയൻ മാർച്ച് ഉത്ഘാടനം ചെയ്തു. നിലവിൽ സമാനതകളില്ലാത്ത വലിയ പ്രതിസന്ധിയിലൂടെയാണ് കേരളത്തിലെയും രാജ്യത്തെയും കാർഷിക മേഖല കടന്നുപോകുന്നത്. കാലാവസ്ഥാ വ്യതിയാനവും തുടർച്ചയായ കൃഷിനാശവും ഉല്പന്നങ്ങളുടെ വിലത്തകർച്ചയും കാരണം കർഷകർ കടുത്ത കടക്കെണിയിലാണ്. ഇതിനിടയിലാണ് ഇരുട്ടടിയായി രാസവളങ്ങളുടെ വില വീണ്ടും കുത്തനെ വർദ്ധിപ്പിച്ചിരിക്കുന്നത്.
വളം സബ്സിഡി വെട്ടിക്കുറച്ചുകൊണ്ട് കേന്ദ്ര സർക്കാർ കോർപ്പറേറ്റ് കമ്പനികൾക്ക് കർഷകരെ ചൂഷണം ചെയ്ത് കൊള്ളലാഭം ഉണ്ടാക്കാനുള്ള അവസരമാണ് ഒരുക്കിക്കൊടുക്കുന്നത്. ഫാക്ടംഫോസ്, പൊട്ടാഷ്, യൂറിയ തുടങ്ങിയ അവശ്യ വളങ്ങളുടെ വില സാധാരണ കർഷകന് താങ്ങാൻ കഴിയാത്ത വിധം വർദ്ധിച്ചിരിക്കുകയാണെന്നും അദ്ദേഹം പറഞ്ഞു. കിസാൻസഭ ജില്ലാ പ്രസിഡന്റ് ആർ.രാജേന്ദ്രൻപിള്ള അധ്യക്ഷത വഹിച്ചു. കിസാന് സഭ ജില്ലാ സെക്രട്ടറി റ്റി.മുരുകേഷ് സാഗതം ആശംസിച്ചു. സി.പി.ഐ മണ്ഡലം സെക്രട്ടറി അനിൽ, കിസാന് സഭ സംസ്ഥാന കമ്മറ്റി അംഗങ്ങളായ ജോജോ കോവൂർ, അഡ്വ. സത്യാനന്ദപ്പണിക്കര്, രേഖ അനിൽ എന്നിവർ സംസാരിച്ചു. കിസാന്സഭ മണ്ഡലം സെക്രട്ടറി പ്രസന്നചന്ദ്രൻ പിള്ള യോഗത്തിന് നന്ദി പറഞ്ഞു.
