എറണാകുളം : അരൂർ നിയമസഭാ മണ്ഡലത്തിൽ നിന്ന് അട്ടിമറി വിജയം നേടിയ യുഡിഎഫ് സ്ഥാനാർത്ഥി ഷാനിമോൾ ഉസ്മാൻ വരാനിരിക്കുന്ന മന്ത്രിസഭയിൽ വനിതകൾക്ക് അർഹമായ പ്രാതിനിധ്യം നൽകണമെന്ന് ആവശ്യപ്പെട്ടു. കേവലം പേരിന് വേണ്ടി ഒന്നോ രണ്ടോ വനിതകളെ ഉൾപ്പെടുത്തുന്നതിന് പകരം യുഡിഎഫ് മാതൃകാപരമായ രീതിയിൽ മതിയായ പ്രാതിനിധ്യം ഉറപ്പാക്കണമെന്നും അവർ പറഞ്ഞു. ഇത്തവണ യുഡിഎഫിൽ നിന്ന് വിജയിച്ചവരിൽ സ്ത്രീകളുടെ എണ്ണം കൂടുതലാണെന്നും കടുത്ത പോരാട്ടം നടന്ന മണ്ഡലങ്ങളിൽ പോലും സമർത്ഥരായ വനിതാ നേതാക്കൾ വിജയിച്ചു വന്നിട്ടുണ്ടെന്നും അവർ അഭിപ്രായപ്പെട്ടു.
മന്ത്രിസഭയിൽ അർഹമായ പരിഗണന ഇവർക്ക് ലഭിക്കണമെന്ന് അവർ ആവശ്യപ്പെട്ടു. അരൂർ മണ്ഡലത്തിൽ വലിയ രാഷ്ട്രീയ പോരാട്ടമാണ് നടന്നതെന്നും യുഡിഎഫ് പ്രവർത്തകരുടെ ഐക്യമാണ് വിജയത്തിന് പിന്നിലെന്നും അവർ പറഞ്ഞു. മണ്ഡലത്തിലെ വികസന പ്രവർത്തനങ്ങൾക്ക് മുൻഗണന നൽകുമെന്നും പ്രത്യേകിച്ച് തുറവൂർ, കുത്തിയതോട് തുടങ്ങിയ പടിഞ്ഞാറൻ മേഖലകളിലെ കുടിവെള്ള പ്രശ്നത്തിന് അടിയന്തിരമായി പരിഹാരം കാണുമെന്നും അവർ ഉറപ്പുനൽകി.
