കോഴിക്കോട്: ചാത്തമംഗലത്ത് കാട്ടുപന്നിയുടെ ആക്രമണത്തില് മധ്യവയസ്കയ്ക്ക് പരിക്ക്. വളയന് കോട്ടുമ്മല് ആമിനക്കാണ് ഗുരുതരമായി പരിക്കേറ്റത്. രാവിലെ 11.30 ഓടെ ആടിന് ഇല ശേഖരിക്കാനായി വയലില് പോയപ്പോഴാണ് സംഭവം. പരിക്കേറ്റ ആമിനയെ കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു. ആമിനയെ ഒരു മാസം മുമ്പും സമാന രീതിയില് കാട്ടുപന്നി ആക്രമിച്ചിരുന്നു.
അപ്രതീക്ഷിതമായി ഓടിയെത്തിയ കാട്ടുപന്നി ഇവരെ നെഞ്ചില് കുത്തി വീഴ്ത്തുകയായിരുന്നു. നിരന്തരമായി കാട്ടുപന്നി ആക്രമണം ഉണ്ടാകുന്ന മേഖലയാണിത്. പകല് സമയങ്ങളില് കാട്ടുപന്നി ആക്രമണം ഉണ്ടാകാറില്ല. ആദ്യമുണ്ടായ ആക്രമണത്തില് ആമിനക്ക് കൈക്കും കാലിനും പരിക്കേറ്റിരുന്നു. അത് പൂര്ണ്ണമായും ഭേദമാകുന്നതിന് മുമ്പാണ് ഈ ആക്രമണം നടന്നിരിക്കുന്നത്.
