കന്യാകുമാരി; വൈദ്യുതി തൂണില് കെട്ടിയിട്ട് മര്ദിച്ച യുവതിയെ വീണ്ടും മര്ദ്ദിച്ചെന്ന് പരാതി. കന്യാകുമാരി ജില്ലയിലെ കുഴിത്തുറ മേല്പുറം ജംഗ്ഷനില് വൈദ്യുതി പോസ്റ്റില് വിധവയായ യുവതിയെ കെട്ടിയിട്ട് മര്ദ്ദിച്ച സംഭവത്തില് യുവതിക്ക് നേരെ വധഭീഷണി മുഴക്കിയിരിക്കുകയാണ് ബന്ധുക്കള്. കേസ് പിന്വലിക്കണമെന്നും ഇല്ലെങ്കില് കൊലപ്പെടുത്തുമെന്ന് ഭീഷണിപ്പെടുത്തിയെന്നും തുടര്ന്ന് യുവതിയെ മര്ദ്ദിച്ചെന്നും പരാതിയില് പറയുന്നു. മേല്പുറം സ്വദേശിനി കലയെ (35)ആണ് ഏതാനും ദിവസങ്ങള്ക്ക് മുന്പ് ഒരു സംഘം കെട്ടിയിട്ട് മര്ദ്ദിച്ചത്.
സംഭവത്തില് മേല്പുറം, പാകോട് സ്വദേശികളായ നടരാജിന്റെ മകന് ശശി(47), നാഗേന്ദ്രന്റെ മകന് വിനോദ് (44), അമ്പയന്റെ മകന് വിജയകാന്ത് (37) എന്നിവരെ പൊലീസ് അറസ്റ്റ് ചെയ്തിരുന്നു. എന്നാല് ഒളിവില് പോയ ഗുണ്ട ദിപിന്, അരവിന്ദ് എന്നിവരെ പോലീസ് ഇതുവരെ അറസ്റ്റ് ചെയ്തിട്ടില്ല. ഇന്നലെ രാവിലെയാണ് പ്രതികളുടെ ബന്ധുക്കള് എന്ന് പറഞ്ഞ് കല താമസിക്കുന്ന വീട്ടിലെത്തിയ ഒരു സംഘം ആളുകള് കേസ് പിന്വലിക്കണമെന്നും ഇല്ലെങ്കില് കൊലപ്പെടുത്തുമെന്നും ഭീഷണിപ്പെടുത്തിയത്.
