പത്തനംതിട്ട: പെട്രോളിനും ഡീസലിനും പാചകവാതകത്തിനും അനിയന്ത്രിതമായി വില വര്‍ദ്ധിപ്പിക്കുന്നതിനെതിരെ വിമൻ ഇന്ത്യ മൂവ്മെന്റ് പത്തനംതിട്ട ജില്ലാ കമ്മിറ്റിയുടെ ആഭിമുഖ്യത്തിൽ ഹെഡ് പോസ്റ്റ് ഓഫീസിനു മുന്നിൽ അടുപ്പുകൂട്ടി പ്രതിഷേധിച്ചു.
കുത്തകകളെ സംരക്ഷിക്കുന്ന മോദി സർക്കാരിന്റെ തെറ്റായ നടപടികളിൽ പൊതുജനത്തിന്റെ മൗനം അപകടകരമാണ്. ജനത്തെ പട്ടിണിക്കിടുന്നതിനെതിരെ സമരമുഖത്ത് സജീവമാകണം. ഇതിനെതിരെ വരും ദിനങ്ങളിൽ കൂടുതൽ പ്രതിഷേധം ഉയരുമെന്നും നേതാക്കൾ പറഞ്ഞു. ആറന്മുള മണ്ഡലം പ്രസിഡന്റ് ഷാമിനി, സെക്രട്ടറി ഷൈജ, കമ്മിറ്റി അംഗങ്ങളായ റംസി, തനൂജ, സ്വാലിഹ എന്നിവര്‍ സമരത്തിന്‌ നേതൃത്വം നൽകി.
