ന്യൂയോര്ക്ക് : മഹാമാരിയായ കൊവിഡ് ലോകത്ത് ദുരന്തങ്ങള് വിതച്ച് മുന്നോട്ട്. വൈറസിന്റെ രണ്ടാം തംരഗത്തില് രോഗവ്യാപനവും മരണവും കുത്തനെ കൂടുകയാണ്. ഇതിനകം 16 കോടി 3 ലക്ഷത്തി പതിനാറായിരത്തി തൊള്ളായിരത്തി എണ്പത്തിയാറുപേര് വൈറസിന്റെ പിടിയില്പ്പെട്ടു. 33 ലക്ഷം കൊവിഡ് മരണങ്ങളും ലോകത്തുണ്ടായി.
അമേരിക്കയിലാണ് ഏറ്റവും കൂടുതല് കൊവിഡ് മരണങ്ങള് റിപ്പോര്ട്ട് ചെയ്തത്. യു എസില് 5.96 ലക്ഷം പേരാണ് മരിച്ചത്. രോഗികളുടെ എണ്ണത്തിലും അമേരിക്ക തന്നെയാണ് ഒന്നാം സ്ഥാനത്ത്. രാജ്യത്ത് മൂന്ന് കോടി മുപ്പത്തിയഞ്ച് ലക്ഷം പേര്ക്കാണ് കൊവിഡ് സ്ഥിരീകരിച്ചത്. രോഗബാധിതരുടെ എണ്ണത്തില് ഇന്ത്യയാണ് രണ്ടാം സ്ഥാനത്ത്. ബ്രസീലിലും മരണസംഖ്യ കുത്തനെ ഉയരുകയാണ്. 4.25 ലക്ഷം പേരാണ് വൈറസ് ബാധ മൂലം മരണമടഞ്ഞത്. ഫ്രാന്സ്, തുര്ക്കി, റഷ്യ എന്നീ രാജ്യങ്ങളാണ് കൊവിഡ് കണക്കുകളില് തൊട്ടടുത്ത സ്ഥാനത്തുള്ളത്.