റാന്നി : റാന്നി എം.എൽ.എ അഡ്വ.പഴകുളം മധുവിന്റെ നേതൃത്വത്തിൽ ഇട്ടിയപ്പാറ ബസ് സ്റ്റാൻഡിൽ ഫിഫ ലോകകപ്പ് 2026 സെമി ഫൈനൽ മത്സരം ബിഗ് സ്ക്രീൻ പ്രദർശനം നടത്തി. അർജന്റിനയും ഇംഗ്ലണ്ടും തമ്മിലുള്ള സെമി ഫൈനൽ മത്സരം നൂറുകണക്കിന് കായികപ്രേമികൾ ഒരുമിച്ച് ബിഗ് സ്ക്രീനിൽ ആസ്വദിച്ചു. അർധരാത്രിയിലും ബസ് സ്റ്റാൻഡ് ഫുട്ബോൾ ആവേശത്തിൽ നിറഞ്ഞു. ഇടുക്കി എം.എൽ.എ റോയി കെ.പൗലോസും ഇട്ടിയപ്പാറയിലെത്തി റാന്നി എം.എൽ.എക്കൊപ്പം മത്സരം വീക്ഷിച്ചു. നിയോജകമണ്ഡലത്തിന്റെ വിവിധ പഞ്ചായത്തുകളിൽ നിന്നെത്തിയ ആരാധകർ തങ്ങളുടെ ഇഷ്ട ടീമുകൾക്ക് ആവേശപൂർവ്വം പിന്തുണ നൽകി.
കാരുണ്യ ഡിജിറ്റൽ ഷോപ്പ്, കാരുണ്യ എനർജീസ് എന്നിവയുടെ സഹകരണത്തോടെയാണ് തത്സമയം മത്സരം പ്രദർശിപ്പിച്ചത്. ജനപങ്കാളിത്തം കൊണ്ടും ആവേശം കൊണ്ടും ശ്രദ്ധേയമായ പരിപാടി റാന്നിയിലെ ഫുട്ബോൾ ആരാധകർക്ക് വേറിട്ട അനുഭവമായി. ഈ മാസം 19-ന് രാത്രിയിൽ നടക്കുന്ന ഫിഫ ലോകകപ്പ് ഫൈനൽ മത്സരവും ഇട്ടിയപ്പാറ ബസ് സ്റ്റാൻഡിൽ ബിഗ് സ്ക്രീനിൽ തത്സമയം പ്രദർശിപ്പിക്കുമെന്ന് റാന്നി എം.എൽ.എ അഡ്വ.പഴകുളം മധു പറഞ്ഞു. ഫുട്ബോൾ ആരാധകർക്ക് ഒരുമിച്ച് ഫൈനൽ മത്സരം ആസ്വദിക്കാനുള്ള സൗകര്യം ഒരുക്കുമെന്നും അദ്ദേഹം പറഞ്ഞു.
