തൃശൂര്: മൊബൈല് ഫോണ് ഉപയോഗിക്കുന്നതിനിടെ പൊട്ടിത്തെറിച്ച് എട്ടുവയസ്സുകാരി മരിച്ച സംഭവത്തില് പ്രതികരണവുമായി ഷവോമി ഇന്ത്യ. സംഭവത്തെ ഗൗരവത്തോടെയാണ് കാണുന്നതെന്ന കമ്പനി അറിയിച്ചു. കുടുംബത്തിന്റെ ദുഖത്തില് പങ്കുചേരുന്നുവെന്നും സാധ്യമായ എല്ലാ സഹായങ്ങളും ചെയ്യുമെന്നും അന്വേഷണവുമായി സഹകരിക്കുമെന്നും ഷവോമി ഇന്ത്യ പ്രതികരിച്ചു. തിങ്കളാഴ്ച രാത്രിയാണ് പട്ടിപ്പറമ്പ് കുന്നത്ത് വീട്ടില് അശോക് കുമാറിന്റെ മകള് ആദിത്യശ്രീയാണ് മരിച്ചത്. വീഡിയോ കാണുന്നതിനിടെ ഫോണ് പൊട്ടിത്തെറിക്കുകയായിരുന്നു.
അതേസമയം സംഭവത്തില് പോലീസ് വിശദാന്വേഷണം ആരംഭിച്ചു. രണ്ട് വര്ഷം മുമ്പ് പാലക്കാട്ടെ എംഐ കമ്പനി സര്വ്വീസ് സെന്ററില് നിന്ന് ബാറ്ററി മാറിയിരുന്നതായി മരിച്ച കുട്ടിയുടെ പിതാവ് മൊഴി നല്കി. ഇനി ഇത്തരം സംഭവം ആവര്ത്തിക്കാതിരിക്കാന് ബന്ധപ്പെട്ടവര് നടപടി സ്വീകരിക്കണമെന്ന് പിതാവ് അശോകന് പറഞ്ഞു. ഫോണ് ചാര്ജ് ചെയ്യുമ്പോഴല്ല അപകടമെന്നു വീട്ടുകാര് പറയുന്നു. ബാറ്ററിക്കകത്തെ ജെല് ചൂടില് ഗ്യാസ് രൂപത്തില് ആയി മാറി ഫോണിന്റെ സ്ക്രീനില് ചെറിയ സുഷിരമുണ്ടാക്കി ചീറ്റിത്തെറിച്ചതാകാം ദുരന്തത്തിനിടയാക്കിയതെന്നാണു ഫൊറന്സിക് ഉദ്യോഗസ്ഥരുടെ നിഗമനം.
