തൃപ്പൂണിത്തുറ : വയോധികയെ വീടുകയറി ആക്രമിച്ച കേസില്‍ യുവാവ് അറസ്റ്റില്‍. ഉദയംപേരൂര്‍ ഗ്രാമപഞ്ചായത്ത് കണ്ടനാട് ഭാഗത്ത് ഒറ്റക്ക് താമസിക്കുന്ന 66കാരിയുടെ വീട്ടില്‍ അതിക്രമിച്ച്‌ കയറുകയും ഭീകരാന്തരീക്ഷം സൃഷ്ടിക്കുകയുമായിരുന്നു. ഉദയംപേരൂര്‍ കണ്ടനാട് കരയില്‍ ഇടയത് മുഗള്‍ ഭാഗത്ത് ഇളയിടത്ത്കുടി വീട്ടില്‍ ഷൈജുവിനെയാണ് (39) ഉദയംപേരൂര്‍ പോലീസ് അറസ്റ്റ് ചെയ്തത്.
കഴിഞ്ഞ 29ന് രാത്രിയാണ് സംഭവം. കാറില്‍ വയോധികയുടെ വീടിനുസമീപം എത്തിയ പ്രതി മുന്‍വാതിലിലൂടെ കയറി വാതില്‍ അടച്ചു കുറ്റിയിടുന്നത് കണ്ട് പേടിച്ച വയോധിക പിന്‍വാതിലിലൂടെ ഇറങ്ങിയോടി അയല്‍പക്കത്തെ വീട്ടില്‍ അഭയം തേടുകയായിരുന്നു. അയല്‍വാസികളും മറ്റും എത്തുന്നതിനുമുമ്പ് പ്രതി സ്ഥലത്തുനിന്ന് കടന്നുകളഞ്ഞു. പരാതി ലഭിച്ച ഉടന്‍ അന്വേഷണം ആരംഭിച്ചിരുന്നു. കൃത്യമായ അന്വേഷണത്തിനൊടുവിലാണ് പ്രതിയെ അറസ്റ്റ് ചെയ്തത്. പ്രതിക്കെതിരെ, വീടുകയറി ആക്രമിച്ചതിന് വീട്ടമ്മയെ ഉപദ്രവിച്ചതിന് ഒരു കേസും മദ്യം സൂക്ഷിച്ച കാര്യം പോലീസില്‍ അറിയിച്ചെന്ന് ആരോപിച്ച്‌ ദമ്പതികളെ തടഞ്ഞുനിര്‍ത്തി ഭീഷണിപ്പെടുത്തിയതിന് മറ്റൊരു കേസും ഉദയംപേരൂര്‍ സ്റ്റേഷനില്‍ രജിസ്റ്റര്‍ ചെയ്തിട്ടുണ്ട്. കൂടാതെ 60ഓളം കുപ്പി വിദേശമദ്യം സൂക്ഷിച്ചതിന് പ്രതിക്കെതിരെ പിറവം പോലീസ് സ്റ്റേഷനിലും കേസുണ്ട്. പ്രതിയെ ചോറ്റാനിക്കര മജിസ്ട്രേറ്റ് കോടതിയില്‍ ഹാജരാക്കി.
