തൃശൂര് : ബെവ്കോ സൂപ്പര് മാര്ക്കറ്റില് കയറി യുവാവിന്റെ വിളയാട്ടം. മദ്യക്കുപ്പികള് നിലത്തടിച്ചു തകര്ത്തും കുപ്പിച്ചില്ലുകാട്ടി വനിതാ ജീവനക്കാരെ ഭീഷണിപ്പെടുത്തിയും ഇയാള് ഭീകരാന്തരീക്ഷം സൃഷ്ടിച്ചു. തുടര്ന്ന് പുതൂര്ക്കര തൊയകാവില് അക്ഷയ് (24) എന്ന യുവാവിനെ തൃശൂര് വെസ്റ്റ് പോലീസ് അറസ്റ്റ് ചെയ്തു. മുപ്പതിലേറെ വിദേശമദ്യ – ബിയര് കുപ്പികള് ഇയാള് എറിഞ്ഞുടച്ചു. 20,000 രൂപയുടെ നഷ്ടമുണ്ടായെന്നാണു ബവ്കോ അധികൃതരുടെ കണക്ക്. ബിയര് കുപ്പികളുടെ മൂടി തുറന്നു സൂപ്പര് മാര്ക്കറ്റിനുള്ളില് നിന്നു യുവാവ് മദ്യപിക്കുന്ന ദൃശ്യങ്ങളും സിസിടിവിയില് പതിഞ്ഞിട്ടുണ്ട്.
അയ്യന്തോള് പഞ്ചിക്കലിലെ സൂപ്പര് മാര്ക്കറ്റില് ഞായറാഴ്ച വൈകിട്ട് ആറ് മണിയോടെ ആണു സംഭവം. മദ്യം വാങ്ങാനെത്തിയ യുവാവ് കൗണ്ടറിലിരുന്ന വനിതാ ജീവനക്കാരിക്കു നേരെ പ്രകോപനപരമായി സംസാരിച്ചതില് നിന്നാണു തുടക്കമെന്നു ജീവനക്കാര് പറയുന്നു. നാല് വനിതാ ജീവനക്കാരും രണ്ട് പുരുഷ ജീവനക്കാരുമാണു ഉണ്ടായിരുന്നത്. ഇവര്ക്കു നേരെ ഭീഷണി മുഴക്കിക്കൊണ്ടു യുവാവ് സൂപ്പര് മാര്ക്കറ്റിനുള്ളിലൂടെ തലങ്ങും വിലങ്ങും നടന്നു മദ്യക്കുപ്പികള് അടിച്ചു തകര്ക്കുകയായിരുന്നു. ചോദ്യം ചെയ്ത വനിതാ ജീവനക്കാരിയെ ഉന്തുകയും കുപ്പിച്ചില്ല് ഉയര്ത്തി വധഭീഷണി മുഴക്കുകയും ചെയ്തു.
