നേമം : നിരവധി ക്രിമിനല് കേസുകളിലെ പ്രതിയെ ഗുണ്ടാ നിയമപ്രകാരം അറസ്റ്റ് ചെയ്ത് കരുതല് തടങ്കലിലാക്കി. തിരുമല തൃക്കണ്ണാപുരം ആറാമട കൃഷ്ണകൃപ വീട്ടില് മിട്ടു എന്ന അരവിന്ദിനെയാണ് (24) പൂജപ്പുര പോലീസ് അറസ്റ്റ് ചെയ്തത്. 2015 മുതല് പൂജപ്പുര പോലീസ് സ്റ്റേഷനിലും സിറ്റിയിലെ വിവിധ പോലീസ് സ്റ്റേഷനുകളിലുമായി അരവിന്ദിനെതിരെ കൊലപാതകശ്രമം, ആയുധം കൈകാര്യം ചെയ്യല്, ഭീഷണിപ്പെടുത്തല്, സംഘം ചേര്ന്ന് ക്രൂരമായി ആക്രമണം നടത്തല് തുടങ്ങിയ വിവിധ കുറ്റകൃത്യങ്ങള്ക്ക് 11 കേസുകള് നിലവിലുണ്ട്.
ഇയാള്ക്കെതിരെ കാപ്പ നിയമപ്രകാരം നടപടി സ്വീകരിക്കണമെന്ന പൂജപ്പുര എസ്.എച്ച്.ഒ റോജിന്റെ റിപ്പോര്ട്ടിന്റെ അടിസ്ഥാനത്തില് ഡെപ്യൂട്ടി കമീഷണര് അങ്കിത് അശോകന് നല്കിയ ശിപാര്ശ പ്രകാരം കലക്ടര് കരുതല് തടങ്കലില് പാര്പ്പിക്കാന് ഉത്തരവ് പുറപ്പെടുവിക്കുകയായിരുന്നു. ഇത് കൂടാതെ, ഡെപ്യൂട്ടി പോലീസ് കമീഷണര് അങ്കിത് അശോകന്റെ ശിപാര്ശ പ്രകാരം തിരുവനന്തപുരം സിറ്റിയില് സ്ഥിരം ക്രിമിനല് പ്രവര്ത്തനങ്ങളില് ഏര്പ്പെട്ടുവരുന്ന അഞ്ച് പേര്ക്കെതിരെ കാപ്പ നിയമം സെക്ഷന് 15 പ്രകാരം നടപടി സ്വീകരിക്കാന് സിറ്റി പോലീസ് കമീഷണര് ഉത്തരവ് പുറപ്പെടുവിച്ചു.
