ദില്ലി : ഫേസ്ബുക്ക് വഴി തോക്കും ആയുധങ്ങളും വിറ്റയാള് അറസ്റ്റില്. ദില്ലി പോലീസാണ് 38 വയസുകാരനെ അറസ്റ്റ് ചെയ്തത്. സൈബര് ക്രൈം വിഭാഗത്തിന്റെ പരിശോധനയിലാണ് ആയുധങ്ങളുടെ ഫോട്ടോകളും വീഡിയോകളും കാണിച്ച് അവ വില്ക്കുന്ന ഫേസ്ബുക്ക് ഗ്രൂപ്പ് കണ്ടെത്തിയത്. കുപ്രസിദ്ധ ഗുണ്ട നേതാവ് ലോറന്സ് ബിഷ്നോയി ഗ്യാങ്ങിന്റെ പേരിലുള്ള ഗ്രൂപ്പ് കേന്ദ്രീകരിച്ചാണ് ഈ ആയുധ കച്ചവടം നടക്കുന്നത് എന്നാണ് പോലീസ് പറയുന്നത്.
നിരവധി വെടിവെയ്പ്പ് കേസുകളും തട്ടിക്കൊണ്ടുപോകലുകളും ഉള്ള ഗുണ്ട സംഘമാണ് ലോറന്സ് ബിഷ്നോയിയുടെത്. ഈ ഗുണ്ട സംഘത്തിന്റെ പേരിലുള്ള ഗ്രൂപ്പില് നടന്ന ചില ആയുധ കച്ചവടത്തിന്റെ സംസാരങ്ങള് പിന്തുടര്ന്ന പോലീസ്, ചില പ്രൊഫൈലുകള് കണ്ടെത്തി. ഇവരെ കേന്ദ്രീകരിച്ചുള്ള അന്വേഷണത്തിലാണ് ആയുധ കച്ചവട സംഘത്തിലെ അംഗവും കുടങ്ങിയത്. പിടിയിലായ ആളുടെ പേര് ഹിതേഷ് രാജ്പുത്ത് എന്നാണെന്നാണ് ദില്ലി പോലീസ് സൈബര് സെല് ഡിസിപി കെപിഎസ് മല്ഹോത്ര പറയുന്നത്.
ഇയാള് ഫേസ്ബുക്ക് വഴി ഫോട്ടോ പ്രദര്ശിപ്പിച്ച് തോക്ക് അടക്കമുള്ള ആയുധങ്ങളും വില്ക്കുന്നുണ്ട് എന്ന വിവരം ലഭിച്ചതിനെ തുടര്ന്ന് വ്യാജ പ്രൊഫൈല് വഴി പോലീസ് ഇയാളെ സമീപിക്കുകയായിരുന്നു. തുടര്ന്ന് ഇയാളുമായി തോക്കുകള് വാങ്ങുവാന് കരാറായി. ഇയാളെ ഹരിയാനയിലെ മനീസറില് പണം കൈമാറാന് എന്ന വ്യാജേന വിളിച്ചു വരുത്തി പോലീസ് പിടികൂടുകയായിരുന്നു. ഇയാളുടെ ഫോണും പോലീസ് കസ്റ്റഡിയില് എടുത്തിട്ടുണ്ട്.
