കണ്ണൂര് : കാറില് കടത്തുകയായിരുന്ന മാരക ലഹരി മരുന്നുകളുമായി യുവാവ് പിടിയില്. കൊയിലാണ്ടി തുറയൂര് സ്വദേശി നടക്കല് ഹൗസില് സുഹൈലിനെ (25) കണ്ണൂര് എക്സൈസ് എന്ഫോഴ്സ്മെന്റ് ആന്റ് ആന്റി നാര്ക്കോട്ടിക് സ്പെഷ്യല് സ്ക്വാഡ് എക്സൈസ് ഇന്സ്പെക്ടര് എം.ജിജില് കുമാറും സംഘവും അറസ്റ്റു ചെയ്തത്. വാഹന പരിശോധനക്കിടെ ബല്ലാര്ഡ് മൂന്നാംപീടികക്ക് സമീപത്ത് വെച്ചാണ് 335 ഗ്രാം എല്.എസ്.ഡിയും 15.37 ഗ്രാം മെത്താംഫിറ്റാമിനുമായി യുവാവ് പിടിയിലായത്.
കണ്ണൂര് ഭാഗത്ത് വില്പനക്കെത്തിച്ചതാണ് മയക്കുമരുന്ന്. പ്രതിയില് നിന്ന് ഇടപാടുകാരുമായി ബന്ധപ്പെടാന് ഉപയോഗിച്ച മൊബൈല് ഫോണും 1000 രൂപയും എക്സൈസ് സംഘം പിടിച്ചെടുത്തു. എക്സൈസ് ഇന്റലിജന്സിലെ പ്രിവന്റീവ് ഓഫീസര് സി വി.ദിലീപിനു ലഭിച്ച രഹസ്യവിവരത്തിന്റെ അടിസ്ഥാന ത്തിലായിരുന്നു വാഹന പരിശോധന. ഇയാള് സഞ്ചരിച്ച ടയോട്ട കാറും അധികൃതര് കസ്റ്റഡിയിലെടുത്തു. റെയ്ഡില് പ്രിവന്റിവ് ഓഫീസര്മാരായ കെ.പി.വിജയന്, കെ.സി ഷിബു, ഗ്രേഡ് പ്രിവന്റിവ് ഓഫിസര് പുരുഷോത്തമന്, സിവില് എക്സൈസ് ഓഫീസര്മാരായ പങ്കജാക്ഷന്, സുജിത്ത്, പ്രവീണ് ഷിബു എന്നിവരുമുണ്ടായിരുന്നു.
