അടൂര്‍ : അടൂരില്‍ വയോധികയെ മര്‍ദിച്ച കുറ്റത്തില്‍ ചെറുമകന്‍ അറസ്റ്റില്‍. അടൂര്‍ ഏനാത്ത് 98 വയസ്സുകാരി ശോശാമ്മയെ മര്‍ദിച്ച കേസില്‍ എബിന്‍ മാത്യുവിനെയാണ് പോലീസ് അറസ്റ്റ് ചെയ്തത്. എബിന്‍ ശോശാമ്മയെ മര്‍ദ്ദിക്കുന്നത് ദൃശ്യങ്ങള്‍ അടക്കം വീട്ടുകാര്‍ തന്നെയാണ് പരാതി നല്‍കിയത്.
എബിന്‍ വയോധികയെ മര്‍ദിക്കുമ്പോള്‍ വീട്ടുകാര്‍ തടയുന്നത് വീഡിയോ ദൃശ്യത്തില്‍ കാണാം. എന്നാല്‍ ഇതൊന്നും വക വെയ്ക്കാതെയാണ് പ്രതി മര്‍ദ്ദനം തുടര്‍ന്നത്. മദ്യലഹരിയിലാണ് മര്‍ദ്ദിച്ചതെന്ന് ഇയാള്‍ പോലീസിനോട് പറഞ്ഞു. രണ്ടു ദിവസം മുമ്പാണ് സംഭവം നടന്നത്.
ദൃശ്യങ്ങള്‍ ശ്രദ്ധയില്‍പ്പെട്ട വനിതാ കമ്മീഷന്‍ സംഭവത്തില്‍ സ്വമേധയാ കേസെടുത്തു. ഇതുസംബന്ധിച്ച അന്വേഷണ റിപ്പോര്‍ട്ട് ഒരാഴ്ചയ്ക്കകം സമര്‍പ്പിക്കണമെന്ന് അടൂര്‍ ഡിവൈഎസ്പിക്ക് വനിതാ കമ്മീഷന്‍ നിര്‍ദേശം നല്‍കി. കോവിഡ് സാഹചര്യത്തില്‍ എല്ലാവരും സുരക്ഷിതരായി വീട്ടിലിരിക്കേണ്ട ഘട്ടത്തില്‍ ഇത്തരം സംഭവങ്ങള്‍ ഉണ്ടാകുന്നത് നിര്‍ഭാഗ്യകരമാണെന്ന് കമ്മീഷന്‍ അംഗം ഡോ. ഷാഹിദ കമാല്‍ പറഞ്ഞു. അടൂരില്‍ സംഭവസ്ഥലം സന്ദര്‍ശിച്ച് സാഹചര്യത്തിന് അനുസരിച്ച് ആവശ്യമെങ്കില്‍ അവര്‍ക്ക് പ്രത്യേകം താമസ സൗകര്യമൊരുക്കുന്നതിന് വേണ്ട നടപടികള്‍ സ്വീകരിക്കുമെന്നും ഡോ. ഷാഹിദാ കമാല്‍ പറഞ്ഞു.
