കൊല്ലം : വാളത്തുംഗല് ഗവണ്മെന്റ് സ്കൂളില് നിന്നും കേബിളുകള് മോഷ്ടിച്ച കേസില് യുവാവിനെ പോലീസ് അറസ്റ്റ് ചെയ്തു. വാളത്തുംഗല് ആക്കോലില് ആനത്താഴത്ത് വീട്ടില് രവീന്ദ്രന്റെ മകന് ഡാനി എന്നറിയപ്പെടുന്ന അജിത്താണ് അറസ്റ്റിലായത്. ഇരവിപുരം, മയ്യനാട് പ്രദേശങ്ങളിലെ നിരവധി വ്യാപാര സ്ഥാപനങ്ങളിലെയും വീടുകളിലെയും ചെമ്പ് പാത്രങ്ങളും ഇലക്ട്രിക് ഉപകരണങ്ങളും ഇയാള് മോഷ്ട്ച്ചതായി പോലീസ് അറിയിച്ചു. ലഹരിക്കടിമയായ പ്രതി ആഡംബര ജീവിതത്തിനും ലഹരി വസ്തുക്കള് വാങ്ങുന്നതിനുമായി പണം കണ്ടെത്തുന്നതിന് വേണ്ടിയാണ് മോഷണങ്ങള് നടത്തിയതെന്ന് അന്വേഷണത്തില് കണ്ടെത്തി.
ഇയാളുടെ കൂട്ടുപ്രതിയായ ജോമോനെ കഴിഞ്ഞ ദിവസം അറസ്റ്റ് ചെയ്തിരുന്നു. ഇയാളെ ചോദ്യം ചെയ്തതില് നിന്നും ലഭിച്ച വിവരത്തിന്റെ അടിസ്ഥാനത്തില് വിവിധ സ്ഥലങ്ങളില് ഒളിവില് കഴിഞ്ഞിരുന്ന അജിത്തിനെ പാലത്തറയില് നിന്നുമാണ് പോലീസ് പിടികൂടിയത്. ഇരവിപുരം എസ്.എച്ച്.ഓ പ്രസാദ് ജെ യുടെ നേതൃത്വത്തില് എസ്.ഐ മാരായ ദീപു എസ്, അമല് പ്രസാദ്, സി.പി.ഓ മാരായ അനീഷ്, ഷാന് അലി, രാജേഷ്, ദീപു എന്നിവര് അടങ്ങിയ പോലീസ് സംഘമാണ് പ്രതിയെ പിടികൂടിയത്. പ്രതിയെ കോടതിയില് ഹാജരാക്കി റിമാന്റ് ചെയ്തു.
